Hatutan.com, (10 Novembru 2023), Díli —Vise-Ministru bá Fortalesimentu Institusionál, Ministériu Justisa, Paulo Manuel da Silva dos Remédios submete   ona  proposta reforma  Polísia Sientífika Investigasaun Kriminál (PCIC) bá Primeiru-Ministru (PM) Xanana Gusmão.

Lee Mós: JSMP Husu PCIC Aprezenta Relatóriu ho Transparénsia

Vise-Ministru bá Fortalesimentu Institusionál, Paulo Manuel da Silva dos Remédios. Foto: Tome da Silva.

Vise-Ministru Paulo Manuel da Silva dos Remédios hatutan kona-bá reforma PCIC ne’e iha programa Nonu Governu mós ko’alia, katak PCIC no Sentru Formasaun Jurídiku  mós tenke reforma no tenke halo revizaun.

Nia dehan PCIC tenke hetan treinamentu, komesa agora fulan-Novembru to’o fulan-Dezembru 2023 hahú hetan formasaun ka treinamentu.

“Kona-bá prosesu revizaun hahú ho treinamentu, sira tuir treinamentu atu aprende, se sira lakoi aprende fila ba sira nia uma, desizaun final atu troka dekretu lei husi PCIC n’ee husi Primeiru Ministru,” nia hateten.

“Ha’u halo pakote, ha’u halo informasaun bá Primeiru Ministru, bá Konsellu Ministru, ita avansa ho ida-ne’e fó treinamentu halo revizaun ita tenke troka situasaun ida-ne’e, depois desizaun final maka ita hein hosi Konsellu Ministru,” Paulo Manuel da Silva dos Remédios, hato’o bá Jornalista sira, iha Salaun Ministeriu Justisa, Díli, Sesta (10/11/2023).

kona-ba irregularidade ka abuzu podér ne’ebé deskonfia komete hosi superior PCIC, Vise-Ministru ne’e labele fó komentáriu tanba asuntu ne’e natureza konfidensiál.

 “Kona-bá asuntu prosesu disiplinár, ha’u labele fó komentáriu tanba ne’e asuntu natureza konfidensiál, ita iha regra tama iha sistema labele halo komentáriu,” nia hateten.

 Agora, kona-ba alterasaun Vise-Ministru Justisa ne’e garante katak  labele mantein nafatin sistema, komesa hahú fó treinamentu atu halo alterasaun, maibé desizaun atu troka ema no atu troka lei, ne’e desizaun husi Primeiru-Ministru no Konsellu Ministru.

“Ha’u halo proposta, maibé ha’u nia proposta ha’u labele soe ba públiku, tanba nee konfidensiál,” tenik nia.

Lee Mós: PM Xanana Simu Ona Karta Husu Reestrutura Totál PCIC

Jornalista: Gloria Maia