Hatutan.com, (08 Janeiru 2024), Díli – Durante loron 120 mandatu IX Governu ne’ebé lidera hosi Primeiru-Ministru (PM) Xanana Gusmão bele ona iha lisaun sufisiente atu sai baze bá PM Xanana halo remodelasaun.

Lee Mós: Remodelasaun Sei Akontese Iha Marsu 2024

Diretór Ezekutivu Luta Hamutuk, José Alves da Costa. Foto/Tome da Silva

Tuir ONG Luta Hamutuk katak remodelasaun ne’e importante tebes atu  ukun na’in sira iha responsabilidade másimu hodi hatudu nafatin prestasaun servisu ho di’ak tuir mandatu ne’ebé mak iha.

Primeiru Ministru (PM), Xanana Gusmão deklara ona katak iha fulan-Marsu bá oin, nia sei la’o bá ministériu ida-idak hodi haree no halo avaliasaun. Tanba ne’e, membru Governu ida ne’ebé halo servisu la di’ak  sei hasai tau fali ema seluk.

Diretór Ezekutivu Luta Hamutuk, José Alves da Costa, hateten Governasaun iha nasaun ne’ebé de’it mós presiza remodelasaun tanba hili membru Governu ida mai atu hala’o servisu ho responsabilidade tuir mandatu ne’ebé mak iha, maibé membru Governu ida mai halo servisu mak la tuir kompromisu entaun Primeiru-Ministru mak iha podér tomak atu halo remodelasaun.

“Públiku hein hela, la’ós  hein to’o fulan-Marsu, maibé loloos ne’e ita hein to’o loron 120 ne’e. Mas iha loron 120 ne’e la akontese buat ruma, maske uluk Primeiru-Ministru Xanana rasik dehan ho kompromisu boot iha momentu ne’ebá. Ita lahatene membru Governu na’in-40 resin ne’e servisu di’ak hotu mak la hasai ka  balu servisu la di’ak maka kontínua hakuak ida-ne’e mak sai públiku nia preokupasaun,” Diretór Ezekutivu Luta Hamutuk, Jose Alves da Costa  hatete bá Hatutan.com iha nia edifísiu, Farol, Díli Segunda (08/01/2024).

Luta Hamutuk hanesan sosiedade sivíl iha hanoin katak presiza halo remodelasaun no tenke halo avaliasaun ida-idak bá iha ministériu hotu-hotu tanba ne’e tenke haree nia polítika servisu ne’ebé mak iha ne’e ema satisfás ka lae ho sira nia rezultadu servisu.

“Ita hein hela katak remodelasaun ne’e akontese tebes iha fulan-Marsu ka lae. Se iha di’ak liu antes atu tama loron 20 fulan-Maiu ne’e tenke troka kedas sira  ne’ebé mak halo servisu la di’ak ne’e. Tamba ita hare viajen sira ne’e mós demais liu fali ne’ebé presiza haree didi’ak buat sira ne’e,” Nia  hateten.

Diretór Ezekutivu Luta Hamutuk hatutan tan dehan remodelasaun ne’e presiza iha avaliasaun servisu mai hosi Primeiru-Ministru rasik, maibé di’ak liu mós tenke mai ho ekipa ne’ebé mak independente hodi bele haree prestasaun servisu hosi ministériu hotu.

Iha ministériu hotu-hotu ne’ebé mak mai ho orientasaun la halo avaliasaun deside hasai funsionáriu kontratadu hotu iha kada ministériu ne’e problema boot maske rekursus umanus presiza tebes, maibé hasai fali sira tanba ne’e hanesan sosiedade sivíl husu atu haree bá kestaun ida ne’e.

Luta Hamutuk nia avaliasaun servisu ba hotu-hotu durante fulan-lima (5) nia laran iha ministériu 3 ka 4  ne’ebé mak ladún hatudu prestasaun servisu ho di’ak  hanesan ministériu Edukasaun maioria profesór sira kontratadu ka balu voluntáriu de’it, menus fasilidade, Ministériu Saúde problema barak kama bá pasiente la iha, inklui postu saúde sira iha área rural sira problema sura la hotu, Ministériu Interiór agora dadaun problema barak mosu iha fatin-fatin taa-malu no sunu-uma la para, Ministériu Justisa estoke kaderneta  pasaporte agora mamuk no mós  sira seluk ida idak-idak ho nia problema.

Luta Hamutuk husu bá Ministériu idak-idak atu domina nia programa bá tinan 1 to’o 5 idak-idak tenke hatene ninia alvu rasik hodi orsamentu kada anuál mai ne’e ezekuta ho di’ak atu tinan-5 remata bele hetan susesu ruma, nune’e nafatin husu bá Primeiru-Ministru atu kontrola sira ho didi’ak atu IX Governu labele sai hanesan governu falladu.

  Jornalista Estajiáriu :  Lazaro Pereira Quefi