Hatutan.com, (13 Janeiru 2024), Díli— Parlamentu Nasionál (PN) liohosi Komisaun A ne’ebé trata asuntu Lejizlasaun no Justisa, deputadu Patrocínio Fernandes haktuir, Lei la fó dalan bá Prezidente Repúblika (PR), José Ramos-Horta atu husu direitu sidadania bá sidadaun Portugeza, António Sampaio.

Prezidente Komisaun A ne’ebé trata assuntu Lejizlasaun no Justisa, deputadu Patrocinio Fernandes.

Patrocinio Fernandes ko’alia ne’e tanba Prezidente Repúblika  halo pedidu ida mai Parlamentu Nasionál, baixa bá iha Komisaun A no haree tiha ona no fó ona pareser jurídiku bá iha meza PN.

Lee Mós: Ramos-Horta Submete bá PN Pedidu António Sampaio Hakarak Sai Sidadaun Timor

“Ne’ebé Prezidente Repúblika husu atu Parlamentu Nasionál halo deliberasaun hodi atribui sidadania bá sidadaun Portugeza ida naran António Sampaio. Maibé ita nia Lei la fó dalan atu ema ida mak husu fali sidadania bá ema seluk. Sé mak hakarak atu sai sidadaun Timor, nia mak tenki halo rekerimentu. Paraser hanesan ne’e mak ami hatama bá iha meza Parlamentu,” Patrocinio Fernandes hateten iha PN, Sesta (12/01/24).

Deputadu ne’e fó ezemplu katak, bainhira nia  hakarak sai sidadaun Portugés nia rasik mak halo rekerimentu la’ós Prezidente Repúblika mak halo fali nem Prezidente Repúblika Portugál mak halo fali rekerimentu ne’e la’e.

Pedidu Prezidente Repúblika ne’e nia dehan, Komisaun A tau iha konsiderasaun halo analiza ho Lei sira hotu no pareser tékniku bá iha meza Parlamentu hanoin katak Lei fó duni dalan atu ema hotu bele halo rekerimentu atu sai sidadaun Timor-Leste maibé sidadaun ida interese atu hetan nasionallidade ne’e nia mak tenki halo rekerimentu la’ós entidade seluk mak halo.

Antes ne’e iha 11 Janeiru 2024, Prezidente Repúblika (PR), José Ramos-Horta submete pedidu hosi jornalista António Sampaio nian bá Parlamentu Nasionál (PN) atu husu sai sidadaun Timor (Timorense).  

Jornalista Estajiária: Zita Menezes