Hatutan.com, (07 Fevereiru 2024), Díli— Iha Orsamentu Jerál Estadu (OJE) 2024 nian, Autoridade Portuáriu Timor-Leste  (APORTIL) aloka $800.000, hodi bele halo manutensaun bá ró Naknoman no mós ro Berlin Ramelau.

Prezidente APORTIL, Feliciano da Costa.

APORTIL liuhosi ekipa tékniku sira, daudaun ne’e halo hela identifikasaun bá kondisaun sira Ro ahi Nakroman nian, identifika saida mak at no presiza hadi’a, molok lori bá halo manutensaun iha Gresik, Java Leste, Repúblika Indonézia (RI).

Lee Mós: CAC Sei Buka-Tuir Informasaun Kona-bá Tripulante Ró Berlin Ramelau-Nakroma Fa’an Billete $50

Prezidente APORTIL, Feliciano da Costa hateten, ró ahi Berlin Nakroman ninia operasaun ne’e kuaze tinan sanulu-resin ona iha Timor Leste (TL) liuliu ba-mai RAEOA-Ataúro.

“Agora, iha operasaun ró ninian, dala-barak iha Sistema Planu Manutensaun, ko’alia kona-bá oráriu bá manutensaun ró ahi ninian ne’ebé mak tenke halo tuir rekezitu sira mak hatuur iha konvensoens internasionál International Convention for the Safety of Life at Sea ka SOLAS 1974,” nia hateten iha kna’ar fatin Portu Antigu-Dili, Kuarta (07/02/2024).

Tanba ne’e maka, ró ahi sira liu-liu ró ahi pasajeiru nian, orienta katak, kada tinan tenke halo manutensaun hodi halo moris ninia sertifikadu bá Pasenger Sift Certificate. Baze bá ida ne’e maka kada tinan ne’e APORTIL tenke halo manutensaun.

Maibé, haree fila-fali bá realidade Timor-Leste nian, tanba ró ahi Nakroman kuaze opera tinan barak ona, iha tinan kotuk mós, APORTIL la konsege halo manutensaun, tanba ligasaun ho preparasaun tékniku sira bá ro ninian manutensaun ro ahi Berlim Ramelau ne’ebé fila kedan iha loron 25 Dezembru 2023.

Bá tinan ida-ne’e, APORTIL nafatin tau orsamentu bá planu manutensaun ro ahi rua ne’e nian, iha ne’ebé agora daudaun prioritiza hela bá manutensaun ro Ahi Berlin Nakroman.

Ró Berlin Nakroma. Foto/Espesiál.

Entaun, iha manutensaun ne’e mós, presiza identifika nesesidade saida de’it mak halo manutensaun no reparasaun.

Klaru katak, kada tinan APORTIL halo hela manutensaun bá ninia item ne’ebé mak bá manutensaun nian, maibé, buat ida mak tékniku sira presiza halo atualizasaun bá iha ninia estragu sira, ne’ebé akontese durante operasaun iha tasi-laran, tanba transporta pasajeiru bá no mai Oecusse ho Ataúro.

“Entaun, sei halo identifikasaun atu bele pondera ka hamosu lista manutensaun no reparasaun ne’ebé mak agora daudaun, esforsu ida-ne’e mak APORTIL halo hela atu bele sofre bá prosesu preparasaun bá manutensaun,” nia hateten.

Oras-ne’e daudaun, ro Nakroman sei estasiona iha portu Díli no sei iha hela etapa ida verifikasaun, identifikasaun bá ninia estragus balun hodi atualiza item ne’ebé mak bá manutensaun.

Konklui Manutensaun bá Ro Berlim Ramelau

Feliciano da Costa mós informa katak, iha loron 11 Novembru 2023, ekipa tékniku sira akompaña Ró Berlim Ramelau lori bá halo manutensaun iha Kompañia PT. IMS (Indonesia Marina Shipyar) nian, ne’ebé lokalizadu iha Gresik Java Leste, Repúblika Indonézia.

Prossesu manutensaun bá ro ahi ne’e, durante fulan-ida resin, konklui tiha ona ninia manutensaun sira, no fila tiha ona mai Dili, Timor-Leste, iha kedas 25 dezembru 2023.

“Ita nia manutensaun bá Ro Berlin Ramelau ne’e mak fila iha dia 25 dezembru tinan kotuk,” Prezidente APORTIL informa.

Buat sira ne’ebé iha kondisaun ro ne’e nian, durante ne’e halo manutensaun mak hanesan, alende sira ne’ebé iha bee leten, no mós iha bee okos.

Assesória sira ne’e mak APORTIL nota no haree katak, alende ro ninia metais ne’ebé mak aat, iha mós instrumentu sira ka sasan ne’ebé assosiadu iha ro leten.

Ida ne’e mak sira halo manutensaun, iklui sasan sira iha LSA (Life Saving Aplyings) ne’ebé apropria ka hanesan parte hosi rekezitu SOLAS ninian, ka buat ida safety ninian.

“Ne’e mak ita halo manutensaun, kuaze item barak. Ne’ebé, hahú hosi bee okos, under water, ninia akomodasaun, ninia mákina, ninia sasán navegasaun sira ne’e, ita presiza haree, halo manutensaun, halo kuidadu tuir ninia padraun, ninia manuál ne’ebé mak iha,” nia informa.

Jornalista: Rogério Pereira Cárceres