Hatutan.com, (17 Novembru 2021), Díli–Ministériu Justisa (MJ) mantein ho proposta lei númeru 28/V/3 kona-bá organizasaun judisiáriu tanba Prezidente Repúblika seidauk promulga.

Notísia iha Relasaun : Rejeita Komisaun Rekrutamentu, AMJTL Sei Haruka Karta Lamentasaun ba PN

Relasiona ho karta preokupasaun, lamentasaun no diskorda  hosi Asosiasaun Majistratura no Jurídiku Timor-Leste (AMJTL) kona-bá Lei ne’e,  Ministru Justisa Manuel Cárceres hateten, nia parte seidauk bele ko’alia tanba proposta lei ne’e PR seidauk promulga.

“Kona-bá lei órgaun judisiáriu ba husu ba PN, tanba aprovasaun global ne’e iha PN la’ós ha’u, maske proposta ne’e Governu mak submete no ami diskute, maibé aprovasaun final global ne’e Governu la intervein tanba ne’e husu ba PN,” Ministru Manuel Cárceres, hateten ba Hatutan.com bainhira partisipa reuniaun Konsellu Ministru iha Palacio do Governo, Kuarta (17/11/2021).

Antes ne’e, AMJTL hatama ona karta lamentasaun ba PN hodi husu halo mudansa ba artigu balun iha proposta lei númeru  28/V/3 Organizasaun Judisiáriu hodi labele hamosu komisaun rekrutamentu, tanba bele afeta ba independénsia juis no tribunál no konsidera viola Konstituisaun RDTL artigu 128 no prinsípiu separasaun de poderes ho idak-idak nia independénsia hodi labele hadau AMJTL nia knar tuir Konstituisaun haruka.

Konstituisaun RDTL artigu 128 hateten: 1. Konsellu Superiór Majistratura Judisiál nian, órgaun jestaun no dixiplina ida majistradu judisiál sira-nian, ne’ebé iha kompeténsia atu foti, hatún, muda no foti-sa’e juis sira.

2. Juis Prezidente Tribunál Supremu Justisa nian mak prezide Konsellu Superiór Majistratura Judisiál, ne’ebé halo parte vogál sira tuirmai ne’e:
3. a) Ida, Prezidente-Repúblika mak hili;
4. b) Ida, Parlamentu Nasionál mak foti;
5. c) Ida, Governu mak hili;
6. d) Ida, Majistradu Judisiál mak hili husi sira leet.
7. Lei maka regula Konsellu Superiór Majistratura Judisiál nia kompeténsia, organizasaun no nia knar.

No iha artigu 69 hateten Órgaun soberania sira, iha sira-nia relasaun ba-malu no bainhira hala’o knaar, tenke tuir prinsípiu separasaun no interdependénsia kbiit nian ne’ebé iha Lei-Inan nia laran.

Jornalista : Carmelita Isaac