Hatutan.com, (17 Novembru 2021), Díli-Komandu Jerál Polísia Nasional Timor-Leste (PNTL) hamutuk ho Comissão Anti Corrupçăo (CAC), Kuarta (17/11/2021), iha Sentru Formasaun Polísia, Comoro, Díli, selebra akordu kooperasaun ida, nu’udár “konsensu” hodi hala’o operasaun konjunta ba kombate krime korrupsaun iha rai-laran.

Notísia iha Relasaun : KAK Identifika Funsionáriu Na’in-Sanulu Uza Karreta Estadu Durante Finadu

Estrutura CAC ho Komandu Jerál PNTL foto hamutuk hafoin estabelese akordu kooperasaun kombate korrupsaun iha rai-laran. Foto/Hatutan.com

Komandante Jerál PNTL, Komisáriu Faustino da Costa, afirma, liuhosi asinatura ba memorandu ne’e, hakarak atu kria mekanizmu hodi ajuda instituisaun Estadu rua mak hanesan, kna’ar ruma ne’ebé atu hala’o hamutuk ho apoiu malu, uza hamutuk fasilidade balu ne’ebé instituisaun PNTL tantu CAC iha no mós atu bele troka informasaun sira ba malu entre instituisaun rua.

Komisáriu Faustino hateten, CAC ninia ezersísiu atividade instituisaun nian, bele husu kolaborasaun hosi autoridade polisiál, iha kazu kona-ba rekuza asesu ka obstrusaun ka impedimentu ba ezersísiu asaun investigasaun ninian hosi parte destináriu sira, hodi muda obstrusaun ne’e, no hodi garante katak realizasaun no seguransa ba servisu investigasaun nian sei la’o tuir duni dalan no prosesu ne’ebé iha.

“Kooperasaun ne’ebé ohin halo, ho nia objetivu estabelese no haforsa kooperasaun institusionál entre instituisaun rua, no esforsu koletivu hodi prevene no kombate korrupsaun iha TL,” Komandante Jerál PNTL, Komisáriu Faustino da Costa, hateten liuhosi diskursu iha ámbitu serimónia  kooperasaun PNTL ho CAC.

Parte sira, hanesan PNTL ho CAC  konkorda ona atu dezenvolve, promove, no hasa’e kapasitasaun, kapasidade instituisaun nian liuhosi hala’o atividade sira konjuntu, apoiu iha área operasaun ne’ebé CAC sei halo no utiliza temporáriu instalasaun sira, PNTL ninian, iha dilijénsia prosesuál sira, no atividade sira seluk tuir misaun CAC nian.

Komisáriu Faustino afirma, ho kooperasaun servisu ida-ne’e sei la halakon ka la hamenus funsaun jerál sira PNTL no CAC ninian ne’ebé atribui hosi lei, tanba parte sira aseita no konkorda atu define kooperasaun iha área hirak mak hanesan, fornese apoiu seguransa bainhira CAC hala’o ninia kna’ar sira iha nia misaun, inklui tulun investigasaun inkéritu, sindikansia, triazen, ezame ka dilijénsias ruma ne’ebé nesesáriu, mezmu involve suspeitu mai hosi ajente órgaun PNTL.

CAC mós bele husu kolaborasaun autoridade PNTL nian, iha kazu ruma kona-bá rekuza, asesu ka obstrusaun no ka impedimentu ba ezersísiu asaun investigasaun hosi parte destináriu sira hodi muda obstrusaun ne’e, no hodi garante realizasaun no seguransa ba servisu investigasaun nian.

Instituisaun PNTL ho CAC mós sei partilla informasaun kriminál, dadus pesoál, ho dokumentu komprovativu sira seluk ne’ebé mak iha relevánsia ho krime sira ne’ebé mak tama iha kompeténsia eskluzivu instituisaun ida-idak nian.

PNTL sei fasilita CAC atu uza fasilidade téknika sira PNTL nian, hanesan laboratóriu hodi fasilita prosesu sira, tantu mós aulas ba iha prosesu investigasaun kazu espesiál sira.

CAC mós sei uza instalasaun fízika ka espasu PNTL nian hodi halo prosesu sira investigasaun, notifikasaun ba suspeitu ka testemuña hodi garante seguransa atividade CAC nian iha munisípiu, postu administrativu, suku no aldeia sira, inklui uza sela PNTL ninian kuandu iha nesesidade atu promove detensaun ba suspeitu ruma.

“Hala’o operasaun investigasaun konjuntu, ne’ebé prevene no komete krime korrupsaun no mós krime koneksu sira seluk. CAC bele husu tulun ba PNTL hodi fó protesaun ba sasin sira no ba ema seluk ne’ebé kolabora ho CAC iha prosesu investigasaun tuir lejizlasaun ne’ebé aplikavel nomeadamente mak lei númeru 02/2009,” Komisáriu Polísia Faustinoda Costa  esplika.

Hosi parte CAC nian, sei fornese formasaun kona-bá anti korrupsaun no integridade profisionál iha Akademia Polísia no ba ajente senior sira PNTL ninian. Parte rua sei hala’o atividade hamutuk hanesan halo ezersísiu fízika no téknika polisiál iha sentru treinamentu PNTL nian.

Instituisaun seguransa no kriminál ne’e sei hala’o atividade hamutuk hanesan, halo auto stop ka atividade sira ne’ebé durante ne’e ema hotu akompaña no asiste, inklui públiku mós akompaña hodi kontrolu utilizasaun ba viatura Estadu, sein finalidade servisu iha fin de semana no loron feriadu, depende ba nesesidade, inklui mós sei hala’o atividade hamutuk seluk tuir nesesidade ka dezenvolvimentu instituisaun nian, kuandu presiza.

Komisáriu CAC, Sergio Hornai, afirma asinatura ba akordu kooperasaun servisu ida-ne’e, nu’udár aktu solene ida ba instituisaun rua, hahú tiha ona, hodi konkretiza katak, loos duni, importante no estratéjiku. Katak, instituisaun estadu ninian presiza konsolida ba malu.

“Ohin, serimónia ida ne’e, simboliza no ofisializa ita nia aktu iha dezenvolvimentu institusionál ninian. Importante no onra ida ba ita sira ne’ebé marka prezente iha ne’e, atu fó testemuña ba aktu importante ne’e, ne’ebé efetua hosi instituisaun importante rua, liu-liu CAC no mós PNTL,” Komisáriu Sergio Hornai hateten.

Aktu sira ne’e hotu,  tuir Sergio Hornai, atu manifesta intensaun no vontade sira ne’ebé mai hosi instituisaun rua, oinsá mak atu konsolida no halo kooperasaun mútua ida ne’ebé metin, relativamente atu bele kombate kriminalidade iha ámbitu krime sira ordinária, no mós iha krime ba iha estraordinária ka krime sira transnasionál sira organizada ninian.

Aktu hosi serimónia asinatura ne’e, ninia previzaun legál sira, hatuur tiha ona iha artigu 17 no 26, lei númeru 08/2009, ne’ebé hamosu CAC, no mós dekretu númeru 09/2009, iha 18 fulan- Fevereiru, ne’ebé hamosu lei orgánika PNTL ninian.

Ezisténsia hosi lei sira ne’e, ho finalidade maka atu garante no asegura kumprimentu ba iha prevene no kriminalidade iha prátika, ba iha aktu sira korrupsaun no krime koneksu sira ne’ebé define iha lei.

“Ha’u hakarak hato’o pasu hosi objetivu ne’ebé estabelese iha MoU ne’e ninian. Oinsá ita bele hamutuk hodi halo fortalesimentu ba iha kooperasaun institusionál entre CAC no PNTL, iha ámbitu prevensaun no mós kombate kriminalidade korrupsaun ninian,” Sergio Hornai afirma.

CAC nu’udár órgaun polísia kriminál espesializada iha nia atuasaun tuir lei ba rekizitu  legalidade no objetivu ne’ebé artikula ho autoridade kompetente.

Jornalista: Rogério Pereira Cárceres