Hatutan.com, (17 Maiu 2024), Díli – Eleisaun órgaun suku-lima (5) bá segunda volta nian remata ona iha loron 13 fulan-Maiu 2024. Prosesu hotu-hotu la’o normal, maibé iha Suku Lequitura, Munisípiu Aileu, tenke avansa bá re-eleisaun  iha loron 18 fulan-Maiu ne’e tanba kandidatu na’i- rua hetan votu hanesan.

Lee Mós: Eleisaun Órgaun Suku 2024, Suku-Lima Hakat bá Segunda Volta no Taxa Partisipasaun Menus

Diretór Jerál STAE, Elviro Fernandes Moniz. Foto/Lazaro Pereira Quefi

“Ita hotu-hotu akompaña eleisaun órgaun suku segunda volta suku-lima (5) ne’ebé akontese iha loron 13 fulan-Maiu 2024, hili lideransa komunitáriu partikularmente buat hotu la’o normal,” Diretór Jerál STAE, Elviro Fernandes Moniz hateten bá Hatutan.com iha edifísiu STAE, Caicoli, Díli, foin lalais ne’e.

Hosi suku-lima ne’ebé  halo eleisaun bá segunda volta bá kandidatu xefe suku nian nune’e bá pozisaun Xefe Aldeia no delegadu ho delegada sira eleitu tiha ona iha eleisaun primeira volta.

“Bá kandidatu xefe suku na’in-rua; Alarico Almeida Salsinha ho Jose Almedia Salsinha iha Munisípiu Aileu, Suku Lequitura ne’ebé mak hetan rezultadu ka hetan votu hanesan (empata) husi votante 248 ho nulu 3 no iha loron 14 Maiu 2024 bá apuramentu rezultadu iha sede suku Lequitura tanba ne’e la iha kandidatu ida mak atu eleitu bá  xefe suku  tenke re-eleisaun,” Elviro Fernandes Moniz hateten.

Diretór jerál STAE, Elviro Fernandes Moniz hateten bá  prosesu hotu-hotu durante eleisaun lao pasifika, iha ambiente ida kalma no votasaun hahú iha tuku 9:00 dadersan to’o termina iha tuku 3:00 loro-kraik, tanba ne’e kompara ho eleisaun primeiru volta iha diferente uitoan katak to’o ona tuku 3:00 mós ema sei iha forma-liña  votasaun, maibé agora ida ne’e iha tuku 3:00 lorok-raik  kuaze ema la iha hotu ona.

Bainhira remata prosesu bá votasaun hahú kedas ho kontajen votu tanba ne’e iha kontajen votu ne’e mós kuaze antes atu tama ba tuku 6:00 kalan termina sedu ona, maibé iha aldeia rua hanesan Tera Santa iha suku Madohi no iha  aldeia  20 de Setembru iha Suku Bebonuk, Postu Administrativu Dom Aleixo, Munisípiu Dili mak termina tarde mais ou menus liu bá tuku 6:30  kalan.

Husi faze apuramentu ne’e iha suku-haat (4) mak eleitu mak hanesan iha Munisípiu Díli nian hanesan Suku Manleuna, Bebonuk no Madohi no iha Munisipiu Viqueque mak iha Suku Builo ho nune’e agora iha Munisipiu Aileu Suku Lequitura mak kandidatu na’in rua Alarico Almeida Salsinha no Jose Almedia Salsinha hetan votu hanesan.

Bá  kandidatu Xefe suku tolu (3) ne’ebé mak eleitu hanesan Helio Ximenes de Ferreira eleitu bá Xefe Suku Builo, Postu Administrativu Ossu, Munisípiu Viqueque, Jacob Tilman Soares eleitu bá Xefe Suku Manleuna, Postu Administrativu Dom Aleixo, Munisípiu Díli, Alfredo da Costa eleitu ba suku Bebonuk, Postu Administrativu Dom Aleixo, Munisípiu Díli no Bernardino de Cristo eleitu ba Suku Madohi, Postu Administrativu Dom Aleixo, Munisípiu Díli.

Iha eleisaun Segunda volta ne’e nia prosesu ne’e la’o di’ak la rejista reklamasaun no protestu ruma kompara ho eleisaun primeiru volta tanba iha kedas boletin votu tolu, tenke ketak-ketak iha Xefe suku, Xefe Aldeia no delegadu ho delegada mas iha segunda volta ne’e iha boletin votu ida de’it bá Xefe suku ninian ne’ebé prosesu hotu-hotu la’o to’o nia rezultadu mós di’ak.

Total eleitór iha segunda volta ba suku-lima (5) ne’e hamutuk 27.636 nune’e partisipante hamutuk 22.672, la partisipa hamutuk 14.965 hosi ne’e por volta ho total 46%.

Jornalista Estajiáriu  : Lazaro Pereira Quefi