Hatutan.com, (23 Maiu 2024), Díli- Parlamentu Nasionál (PN) liuhosi Bankada CNRT husu Polísia Nasionál Timor-Leste (PNTL) halo seguransa másimu iha fatin riskú ne’ebé identifikadu akontese beibeik  kazu na’ok hanesan hadau ema nian telefone.

Lee Mós: Forsa Konjunta Detein Suspeitu Na’in-rua Ne’ebé Hadau Telefone To’o Rezulta Nituchia Lakon Vida

Membru PN hosi Bankada CNRT, Natalino dos Santos. Foto/Zita Menezes.

Membru Bankada CNRT, Natalino dos Santos hateten sidadaun barak sente la seguru bainhira halo movimentu iha loron no kalan estrada públiku iha kapitál Díli tanba na’okten barak tebes no hafuhu oportunidade asalta ema, liuliu inan-feto sira ne’ebé mak kondús motór tua telemovel iha motór nia bolsu.

“Ita triste rona dehan iha na’okten ten na’ok señora ida nia telefone nune’e señora ne’e ho nia oan duni tuir to’o hetan dezastre rezultadu nia oan mate no inan kondisaun grave. Hakarak bolu atensaun bá komandu PNTL atu halo vizilánsia no tau atensaun bá fatin sira ne’ebé identifikadu risku bá na’okten sira atu hadau telefone tenke tenke kontrola masimu. Patrolla ne’e rotativu, labele lalais de’it,” Deputadu Natalino dos Santos hateten bá jornalista sira iha PN, Kinta (23/05/2024).

Nia  husu atu fó sansaun ida bá autór sira ne’e nune’e bá futuru ema seluk labele halo tuir ida-ne’e. tuir nia, asaun asalta hodi hadau ema nia telemovel ne’e modus krime organizadu tanba iha fatin-fatin halo populasaun sira paniku.

Nia dehan, PNTL iha devér tomak atu halo patrolamentu durante oras 24, liuliu eskuadra sira tenke patrollu rotativa labele iha fatin de’it. Sidade Dili de’it akontese ona hanesan ne’e, oinsa ho munisípiu sira.

Tempu sira liubá, Deputadu Natalino dos Santos dehan, sidadaun  preokupa ho konfrontu entre grupu  arte-marsiál ne’ebé akontese iha fatin-fatin, maibé agora situasaun ne’e hakmatek tiha mosu fali krime organizadu na’okten hodi asaltu ema na’ok iha fatin públiku sira. Nune’e bolu atensaun bá PNTL atu fó seguransa másimu hodi fó hakmatek bá populasaun sira atu halo movimentu.

Jornalista Estajiária: Zita Menezes