Hatutan.com (29 Maiu 2024), Díli-Prezidente Repúblika (PR), José Ramos-Horta, foin lalais ne’e, simu mensajen ho nia konteúdu hato’o keixa kona-bá atendimentu la di’ak iha Aeroportu Internasionál Prezidente Nicolau Lobato, Díli.

Lee Mós: Governu ho Autoridade RAEOA Agradese Aero Dili Fasilita Povu Atoni

Prezidente Repúblika (PR), José Ramos-Horta arranka bá Índia hodi partisipa Simeira Vibrant Gujarat Globál Summit 2024 iha sidade New Delhy, Segunda (08/01/2024). Foto/dok.Tomé da Silva.

Informasaun ne’ebé Hatutan.com asesu hosi fonte balu ne’ebé husu atu la bele publika nia identidade katak keixa ne’e iha relasaun ho aviaun komersiál  ida hosi Austrália ne’ebé halo operasaun mai Timor-Leste husu atu bele landing iha Aeroportu Internasionál Prezidente Nicolau Lobato iha tuku 06.00 dadeer, maibé autoridade kompetente sira, liuliu Autoridade Nasional Aviasaun Sivíl Timor-Leste  (ANATL, sigla portugés) la autoriza  tanba Lei la admite, inklui kondisaun aeroportu seidauk iha  runway lighting ka la iha Airflield Lighting System (AFL).

Ho desizaun husi ANATL ne’e halo aviaun komersiál husi Austrália ne’e tenke aguenta semo de’it iha kalohan leten durante minutu 45 hodi hein to’o oras mak tuun. Mezmu nune’e, bainhira to’o oras atu tuun, ANATL  fó fatin bá aviaun refere tuun iha ninin no la bele mai klaran tanba fatin klaran ne’e esteriliza  ona   atu aviaun Liurai Brunei Darussalam nian  mak tuun.

Ho desizaun ne’e avian ne’e fila-fali de’it no la konsege tuun hodi hein aviaun Luirai Brunei Darussalam nian fila tiha mak nia fun tuun fali.  Tanba ne’e, halo emboot balun iha empreza aéreu Australia nian ne’e hirus hodi  manda mensajen lamentasaun bá Prezidente Repúblika, José Ramos-Horta.

Iha Tersa, 28 fulan-Maiu 2024, Prezidente Repúblika, José Ramos-Horta bolu urjente  Ministru Transporte no Telekomunikasaun (MTK),  Miguel Marques Manitelu no husu atu hadi’a jestaun atendimentu servisu públiku iha Aeroportu Internasionál Prezidente Nicolau Lobato, Comoro, Díli.

Ministru Transporte Komunikasaun (MTK), Miguel Marques Gonçalves Manitelu hateten, nia parte hetan  xamada husi Prezidente Repúblika mai hasoru malu antes Xefe Estadu dezlokasaun ba Singapura no asuntu ne’ebé Xefe Estadu husu atu MTK hamutuk ho ANATL ne’ebé jere Aeroportu ne’e iha asuntu lubuk ida mak ko’alia ligadu ba jestaun aeroportu nian.

Públiku hatene katak iha Aeroportu ne’e la’ós de’it MTK maibé iha mós husi Serviu Migrasaun, Alfándega, Quarentena ne’ebé  tutela ba ministériu seluk.

“Hanesan Prezidente Repúblika nia observasaun katak presiza atu hadi’a jestaun  iha aeroportu, inklui servisu sira hanesan Migrasaun, Alfándega ho Quarentena tanba públiku kestióna liuliu públiku sira ne’ebé uza aviaun tun sa’e tama sai iha aeroportu ne’e kestióna servisu balun ligadu ba entidade sira ne’ebé ohin ha’u temi,” Ministru Miguel Marques Gonçalves Manitelu ba jornalista sira iha Aeroportu Internasionál Prezidente Nicolau Lobato.

Nia argumenta la’ós MTK nia kompeténsia atu manda ka orienta hanesan Migrasaun, Alfándega ho Quarentena mas sei iha koordenasaun ida, mas iha Aeroportu ANATL sei halo koordenasaun ho entidade sira ne’e atu haree ba kestaun sira ne’ebé Xefe Estadu levante no preokupa..

“Politikamente ha’u sei ko’alia ho Ministru Interior liga ho Servisu Migrasaun, Alfándega iha Finansas, Qarentena iha Ministériu Agrikultura presiza iha koordenasaun nivél polítika depois iha okos ne’e tékniku sira bele servisu no halo atendimentu ida ne’ebé di’ak,” Nia dehan.

Pasajeiru sira mai Timor mós aumenta husi loron ba loron entaun ema sira ne’ebé mai ne’e tenke hetan tratamentu di’ak atu ema nia espresaun haree katak  Timor ne’e ema hakarak mai, se mai mak  halo atendimentu ladún di’ak ema mós dala ruma ladún mai  Timor-Leste.

Servisu husi MTK nian liuliu ba Autoridade Aviasaun Sivíl, ho Administrasaun Aérea iha Aeroportu Prezidente Nicolau Lobato nian ne’e, iha kestaun ida ne’ebé mais tékniku mas tanba informasaun ne’e to’o ba Prezidente Repúblika nia ibun presiza halo klarifikasaun.

Nia subliña  Prezidente Repúblika hetan tiha esplikasaun ne’e,  Xefe Estadu bele entende ho razaun balun ne’ebé la hanesan ho keixa ka informasaun ne’ebé to’o ba Prezidente Repúblika nia tulun.

Jornalista: Vito Salvadór