Hatutan.com, (09 Jullu 2024), Dili—Komisaun Funsaun Públika (CFP-Sigla Português) husu bá funsionáriu públiku sira ne’ebé uza patrimóniu Estadu iha loron feriadu, tenke aprezenta karta órden servisu ka guia da marcha hosi instituisaun tutelada.

Komisáriu CFP bá Asuntu Dixiplinár, Agapito da Conceição ho ekipa Comissão Anti Corrupção (CAC), Institutu Jestaun Estadu (IJE), Diresaun Jerál Jestaun Patrimóniu Estadu (DJJPE), hala’o vizita surpréza bá iha Institutu Nasional Farmásia no Produtu Médiku (INFPM), Kampung-Alor, Dili, Tersa (09/07/2024). Foto: Elio dos Santos da Costa.

Komisáriu CFP bá Asuntu Dixiplinár, Agapito da Conceição hateten ida-ne’e bainhira ho ekipa Comissão Anti Corrupção (CAC), Institutu Jestaun Estadu (IJE), Diresaun Jerál Jestaun Patrimóniu Estadu (DJJPE), hala’o vizita surpréza bá iha Institutu Nasional Farmásia no Produtu Médiku (INFPM), Kampung-Alor, Dili.

Lee Mós: Tránzitu Hein Hela Na’in ba Patrimóniu Estadu Ne’ebé Prende Iha Fim de Semana

“Sé mak utiluza ida-ne’e, tenke iha órden servisu. Sé ordém servisu laiha, ne’e oras ida bá iha polisia, depois mak to’o iha Tribunál. Durante ne’e ita hetan funsionáriu balun ne’ebé mak la uza órden servisu, ne’e polisia kaer,” Agapito da Conceição hatán bá Hatutan.com, Tersa (09/07/2024).

Agapito da Conceição mós husu atu públiku labele jeneraliza sira ne’ebé uzu veikulu Estadu nian, tanba dadaun ne’e iha eventu nasionál lubuk ida Timor-Leste, nune’e iha funsionáriu sira iha Ministériu Administrasaun Estatál (MAE), Ministériu Finansas (MF), ho Ajénsia Dezenvolvimentu Nasionál (ADN) inklui instituisaun relevante balun tán mak hala’o hela preparasaun bá simu vizita Sua Santidade Papa Francisco, tanba ne’e sira sempre servisu to’o oras kalan.

“Maibé, ami iha orientasaun bá hothotu tenke uza órden servisu. Patrimóniu Estadu ne’ebé mak sira uza, tenke uza órden servisu, atu polisia bá halo rajia ruma sira bele hatudu órden servisu ne’e,” komisáriu Agapito hateten.

Molok ne’e Governu hasai rezolusaun ida ho númeru 130/2021, ko’alia kona-bá halo fiskalizasaun bá movimentu sira veíkulu Estadu nian.

Komisáriu CFP bá Asuntu Dixiplinár, Agapito da Conceição.

Bainhira asegura ona efisiénsia ba iha despeza sira ne’e bele halo rasionalizasaun, no re-alokasaun despeza sira ne’e ba fali prioridade sira ne’ebé governu sente tenke hatuur iha tinan finanseiru tuir mai.

Iha rezolusaun governu nian ne’e mós bandu diresaun kargu xefia atu lori kareta ka motór Estadu nian bá estasiona fali iha sira-nian rezidénsia privadu, tanba sira rasik hetan tiha ona subsídiu transporte nian kada fulan.

Durante ne’e, ekipa fiskalizasaun konjuntu nian halo tiha ona atividade desiminasaun bá funsionáriu estatál sira to’o iha munisipiu, hodi disemina no esplika kona-bá rezolusaun sira ne’ebé governu hasai hodi mellora despeza sira no efisiénsia no efetividade iha utilizasaun.

Bá funsionáriu sira ne’ebé kontinua halo violasaun, no bainhira ekipa fiskalizasaun konjunta kaer toman, nia prosedimentu ne’e to’o iha Ministériu Públiku, no CFP mós fó sansaun administrativu.

Hatán kona-bá progresu investigasaun hosi atividade vizita surpreza ne’ebé molok ne’e CFP, CAC, DJJPE no IJE hala’o bá Ministériu Komersiu no Indústria (MCI-Sigla Português), Ministériu Agrikultura, Peska, Pekuária no Floresta (MAPPF), seidauk iha rezultadu finál, tanba ekipa sira elabora hela relatóriu.

Jornalista: Rogério Pereira Cárceres