Hatutan.csom, (27 Novembru 2021), Dili—Prezidente Repúblika (PR), Francisco Guterres Lú Olo, iha 25 novembru, liuhusi Dekretu Prezidente Repúblika númeru 102 /2021, iha ámbitu selebrasaun Proklamasaun Independénsia sei kondekora sidadaun nasionál na’in-52.

Prezidente Repúblika, Francisco Guterres Lú Olo. Foto/Média PR.

Iha selebrasaun Loron Proklamasaun Independénsia kada tinan, Prezidente Repúblika hatudu rekoñesimentu no valorizasaun, liuhusi kondekorasaun ho “Ordem Timor-Leste”, ba sidadaun sira ne’ebé kontribui no halo sakrifísiu ba país, tanba hatudu ona espíritu patriotizmu ne’ebé aas tebes, liuhosi sira-nia dedikasaun tomak, inklui entrega sira-nia vida rasik ba libertasaun pátria.

Notísia iha Relasaun:Xefe Estadu Sei Fó Indultu ba Prizioneiru Na’in 11

“Sidadaun na’in-lima sei simu kondekorasaun ‘Kolar Orden Timor-Leste’ ho títulu póstume, na’in-ida sei hetan kondekorasaun ‘Kolar Orden Timor-Leste’, sidadaun na’in-ualu sei simu kondekorasaun ‘Medalla Orden Timor-Leste’ títulu póstume, sidadaun na’in-38 sei hetan kondekorasaun ‘Medalla Orden Timor-Leste,” Komunikadu hosi Palásiu Prezidensiál Nicolau Lobato, Díli.

Iha Dekretu Prezidente Repúblika fó-sai katak, ema hotu-hotu iha devér atu rekoñese no valoriza asaun patriotizmu, dedikasaun no sakrifísiu boot hirak ne’ebé mak sidadaun sira ne’e hatudu ona durante temu luta ba ukun-an.

Sira sakrifika sira-nia tempu juventude no husik oportunidade atu bá tuir edukasaun formál iha eskola tanba hakarak liberta sira-nia rain doben Timor-Leste.

Ohin Estadu no Nasaun tomak fó rekoñesimentu no valorizasaun, liuhusi kondekorasaun Orden Timor-Leste, ba knaar importante hirak ne’ebé mak sidadaun nasionál sira ne’e hatudu tiha ona.

Tuir Dekretu-Lei númeru 20/2009, Ordem Timor Leste nu’udár rekoñesimentu hosi Estadu ba ema estranjeiru ka sidadaun nasionál, ne’ebé liu hosi sira-nia atividade profisionál, sosiál ka asaun espontánea nakonu ho korájen, fó kontribuisaun boot ba Timor-Leste,  ba Timoroan ka ba umanidade.

Jornalista: Rogério Cárceres