Hatutan.com, (07 Novembru 2024), Díli—Ministériu Saúde  identifika iha irregularidade balu iha relatoriu ne’ebe mai husi ospitál sira rai-li’ur ne’ebe fo asistensia mediku bá pasiente transferensia sira.

Lee Mós: Dívida Millaun $20 iha Ospitál Estranjeiru Sira Mai husi 2021

Ministra Saúde, Élia A.A dos Reis Amaral. Foto/Tome da Silva

Ministra Saúde Élia António de Araújo dos Reis Amaral,  informa  relatóriu ne’ebé MS simu husi jestaun ospitál  rai-li’ur sira-ne’e ho total dívida  millaun 21, maibé la signifika ne’e  loos, ho nune’e nu’udár Estadu presiza halo verifikasaun ba pasiente ba rai-li’ur ne’e loos duni sidadaun Timor duni ka lae.

“Atu hatete katak iha ne’ebá ami detekta la’ós sidadaun Timor liu hosi liña ne’ebé iha, ne’e mak ita presiza  haree didiak relatóriu ne’ebe mak mai ho kordenasaun junta medika,  nune’e ita sei halo pagamentu tuir invoice ne’ebé mak mai husi kada  ospitál rai-li’ur sira liga ho pasiente sira ne’ebé halo tratamentu iha rai-li’ur,”  Ministra Saúde Élia Amaral informa ba jornalista sira iha Parlamentu Nasionál hafoin akompaña debate OJE 2025, Kinta (07/11/2024).

Nia esplika ho irregularidades ne’ebé mak iha  relatóriu sira ne’ebé mak ospitál rai-li’ur sira simente mai la’ós atu selu kedas, maibe sei halo kordenasaun ho parte junta medika nasionál bazeia ba Dekretu-Lei 58/2023 /fulan-Setembru ne’ebe hateten kona-bá mekanismu oinsá halo transferensia pasiente ba asistente medika estranjeiru.

Hosi relatóriu ne’ebé mak MS simu no verifika ona, nominal hamutuk millaun $9 no hosi millaun $9  ne’e rasik MS detekta irregularidade barak, entaun ida ne’e mak atu hateten katak ho relatoriu sira ne’ebé mai presiza haree didiak fila fali.

Hosi total dividas sira ne’e MS  faziadamente selu ona  milaun $1  no  haree ba oin antes atu selu kompletamente ba iha fatura sira ne’e presiza iha verifikasaun loloos.

Ministra Élia mœs haktuir tan katak antes assume knar hanesan Ministra Saúde, divida iha ona ho total millaun  $14 ne’ebe mai husi pasiente tinan anterior sira  hosi tinan 2016, 2017 no kontiinua mai to’o 2024. Nune’e, hosi millaun $14 ne’e, MS selu ona millaun $5 ho orsamnetu reatifikativu 2023 bainhira IX Governu hahu nia mandatu ho nune’e sei millaun $7 para selu.

Jornalista: Leopoldina de Carvalho