Hatutan.com, (01 Janeiru 2025), Díli- Ema deskonesidu tiru kilat tama rezidénsia  antigu Prezidente Repúblika no atuál Prezidente Partidu FRETILIN Francisco Guterres Lú Olo iha Farol, Díli.

Foto/Repro Pájina Ofisiál Francisco Guterres Lú Olo

Kronolojia ne’ebé Hatutan.com asesu hosi konta Facebook ofisiál Francisco Guterres Lú Olo, Kuarta (01/01/2025), relata Ksolok Tinan Foun 2025 mai ho kilat musan traiçoeiro. Tebes duni, hori kalan iha 00:00h tinan fahe-malu, ema deskoñesidu, aproveita fogete nia tarutu, tiru kilat tama rezidénsia eis-PR no Presidente Fretilin Francisco Guterres Lú Olo ho intensaun aat atu oho nia.

 Kilat musan (bala real) ne’e fura husi kalen uma tun too kona mesa nia vidru rahun hotu, besik loos tur fatin baibain eis-PR nian iha uma. Hafoin akontesimentu ne’e, seguransa pesoál eis-PR informa kedas ba Komando PNTL no F-FDTL, PCIC, Polisia Militár,  intelijénsia militár nian no polísia forensik too kedas uma rezidénsia hodi halo observasaun direta no halo investiga kona-bá faktu akontesimentu.

“Obrigadu ba imi nia profisionalizmu  liu husi prátika ne’ebé hatudu iha tempu ne’ebé mosu perigu ba ema nia vida! Iha biban ida ne’e ha’u fó hatene mós ba seguransa pessoal ba Titulár Órgaun Soberania nian ka Eis-titulár nian atu hola atensaun no fó seguransa di’ak ba ita-nia na’i ulun sira hotu-hotu. Obrigadu ba atensaun no kontinuasaun Boas Entrada Tinan Foun 2025 ba ita hotu.” Hatutan.com sita husi pájina ofisiál Francisco Guterres Lú Olo.

Antes ne’e mós iha ona ema tiru Kilat musan tama iha rezidénsia Eis-PR no atuál prezidente  partidu FRETILIN ne’e.

Jornalista: Vito Salvadór