Hatutan.com, (02 Dezembru 2021), Dili—Aitana FC sei hasoru ekipa jigante Lalenok United FC iha jogu kontinuasaun Liga Futeból Timor Leste (LFTL), iha jornada dahaat iha estádiu munisipál Díli.

Treinadór Aitana FC Octávio da Costa, Foto/Hatutan.com.

Treinadór Aitana FC Octávio da Costa hateten, Aitana FC iha ona preparasaun ida di’ak integralmente iha fiziku no mós tékniku atu enfrenta jogu jornada dahaat.

Notísia iha Relasaun:Assalam FC Haksoit Sai Hosi Zona Me’an Hafoin Manan DIT FC 3:1

“Ami halo ona avaliasaun ba jogadór sira relasiona ho prestasaun no mentalidade jogadór sira nian hafoin enfrenta jogu rua iha jornada dahuluk no daruak nian, nune’e ami iha esperansa katak ho preparasaun ne’ebé iha ami sei konkista vitória,” Octavio da Costa hateten iha sede LFTL, Bairro dos Grillos, Kinta (02/12/21).

Treinadór ne’e hatutan, la iha razaun atu Aitana lakon iha jogu ne’e tanba kuaze iha ona preparasaun máximu no jogadór hotu ne’ebé ekipa tékniku prepra prontu 100% atu enfrenta jogu.

Nune’e mós Treinadór Lalenok United FC Gaspar Amaral hateten, joga kontra Aitana FC importante ba Lalenok United FC tanba iha segundu jogu falla rekolla vitória  no sei halo esforsu ho meius hotu ne’ebé iha atu bele hetan vitória.

“Ami tenki rekolla vitória iha jogu kontra Aitana FC,” Hateten Gaspar Amaral.

Treinadór Lalenok United FC, Gaspar Amaral. Foto/Hatutan.com.

Ekipa ne’e mós iha ona preparasaun di’ak ba jogadór sira, maibé sente triste tanba lakon jogadór íntimu Santiago Amaral (9) ne’ebé sofre aleiza, nune’e buka ona alternativu solusaun ho jogadór ne’ebé iha atu bele asegura ekipa liiliu iha liña klaran.

Lalenok United FC sei halo esforsu maximu atu rekolla pontu 3 hodi bele asegura pozisaun iha tabela klasifikasaun no garante sei sai kampiaun iha époka ne’e.

Aitana halo ona jogu dala rua iha LFTL époka ne’e no hosi jogu rua ne’e ekipa Aitana FC rekolla de’it pontu ida, bainhira halo impata hasoru AD SLB no lakon hasoru Karketu Dili FC iha jogu apuramentu, enkuantu adversáriu Lalenok United FC mós foin rekolla de’it pontu 3 hosi jogu rua tanba iha segundu jogu derrota hasoru As Ponta Leste FC no manan Assalam FC iha jogu dahuluk.

Jornalista: Vito Salvadór