Hatutan.com, (02 Dezembru 2021), Dili—Ministériu Interiór (MI) liu hosi Servisu Migrasaun (SM), submete ona lista sidadaun hamutuk na’in 762 ne’ebé hakat illegal fronteira terreste durante períudu pandemia Covid-19, ba iha Ministériu Públiku (MP), tanba la obedese ba regra sasaun administrativa ka selu multa, ne’ebé Governu aplika tuir lei.

Diretór Jerál Servisu Migrasaun (SM), iha Ministériu Interiór (MI), Superintendente Assistente Polísia, Luis Barreto. Foto/Hatutan.com

Diretór Jerál Servisu Migrasaun (SM), Superintendente Asistente Polísia, Luis Barreto, haktuir, antes ne’e Timoroan sira hamutuk 770 resin mak hakat ilegál hosi fronteira terrestre TL nian ba Indonézia, hodi partisipa iha atividade grupu arte marsiál.

Notísia iha Relasaun:Governu “Ameasa” Lori Sidadaun 700-resin ne’ebé Hakat Ilegál hosi Fronteira ba MP

Maibé, ikus-mai autoridade Indonézia nian, kompostu hosi Polísia Repúblika Indonézia (POLRI) ho Migrasaun, sira halo kapturasaun no halo kedan deportasaun mai TL.

Bainhira to’o iha TL, sidadaun sira ne’e mós kumpri ona regra hosi Ministériu Saúde nian, hodi kumpri iha kuarantena durante loron 14, hafoin entrega ba Servisu Migrasaun atu hala’o nia kompeténsia tuir lei, liu-liu aplika multa.

Iha prosesu selu multa ne’e, sidadaun hamutuk na’in-50 resin de’it mak selu ona multa ba Governu, no balun seidauk selu to’o agora. Tanba ne’e, Servisu Migrasaun submete ona lista naran sidadaun sira nian iha MP atu prosesa tuir lei.

“Liu ona prazu ne’ebé mak fó notifikasaun, ne’e mak ami lori ona kazu ne’e entrega ona ba iha Ministériu Públiku iha Maliana no Suai, hodi halo prosesu ba oin. Ami lori ba ne’e, ema 762. Sira ida selu ne’e, ami la lori,” Diretór jerál Servisu Migrasaun (SM), hateten ba Hatutan.com, iha kna’ar fatin Vila Verde, Kinta (02/12/21).

Bainhira husu kona-bá sidadaun sira ne’e, karik hato’o mós preokupasaun ruma ba SM, nia dehan, migrasaun nia servisu prosesa de’it sansaun administrativa. Maibé karik la selu, maka Servisu Migrasaun iha dever atu lori kazu ne’e ba iha Ministériu Públiku, no Tribunál mak sei deside.

“Durante ne’e laiha. Sira mós nonook, sira lakohi komunika ho ami, ho ida ne’e, ami tenke lori, tanba liu ona prazu notifikasaun, tenke lori ba tribunál mak bele deside,” Luis Barreto, haktuir.

Nune’e, kazu sidadaun 762 nian ne’e, parte SM laiha tán ona kompeténsia no entrega hotu ona ba MP atu assume responsabilidade másimu.

Jornalista: Rogério Pereira Cárceres