Hatutan.com, (29 Marsu 2025), Covalima– Postu Saúde Suku Biseuk, Postu Administratvu Tilomar, Munisípiu Covalima, harii ho kustu $295,785,42, maibé la bele utiliza tanba kondisaun infraestrutura aat total.

Postu Saúde Suku Biseuk, Postu Adminitrativu Tilomar, Munisípiu Covalima ne’ebé harii iha tinan 2021 la bele utiliza tanba kondisaun aat total. Foto/Tome da Silva

Prezidente Repúblika (PR), José Ramos-Horta, ne’ebé haree rasik kondisaun Postu Saúde ne’e la kontente no hirus loos hodi husu Governu liuhosi Ministériu Saúde atu labele inaugura Postu Saúde refere.

“Postu Saúde ne’e labele inaugura tanba aat total no atu inaugura karik, se mak atu simu ha’u mak hanesan Prezidente Autoridade Munisípiu Covalima ka Autoridade lokal karik ha’u la simu tanba Sentru Saúde ne’e aat total no ita lakon osan $295,785,42 no agora Komisaun Anti-Korrupsaun (CAC) ho Prokuradór Jerál Repúblika la halo buat ida to’o agora ita nia komunidade mak sai vítima nafatin,” Prezidente Repúblika José Ramos-Horta haktuir ba Jornalista sira, Kinta (27/03/2025).

Ramos-Horta  dehan, Sentru Saúde ne’e konstrui hosi oitavu Governu ho nia orsamentu  $295,785,42, maibé Ramos-Horta  lahatene se mak halo desizaun husi Ministériu Saúde la halo Estudu hodi haree rai ne’e nia kualidade hodi tau arbiru no fó ba kompañia CARAME UNIP.Lda harii Sentru Saúde ne’e seidauk entrega maibé aat ona no nakfera  hotu atu monu daudaun ona.

Sujere CAC Tau-Matan

Ramos-Horta tenik tanba komunidade mak sai vítima  atu hetan fasilidade saúde husu ba PGR ho CAC mai haree no tau-matan tanba Estadu lakon osan $295,785,42 hodi husi CARAME UNIP.LDA nia responsabilidade.”

Administradór Postu Administrativu Tilomar, Venâncio Sarmento, dehan Postu Saúde ne’ebé kompañia CARAMAE UNIP.LDA konstrui iha 2021 konsege halo hotu, maibé hetan estragu husi inundasaun to’o oras ne’e seidauk halo manutensaun.

Infraestutura Postu Saúde Biseuk nakfera no besik monu daudaun ona. Foto/Tome da Silva

“Ami hato’o ona ba ministériu kompetente atu bele mai identifika atu bele hadi’a ka konstrui Postu Saúde foun tanba ami nia komunidade iha Suku Biseuk ho totál abitante rihun atus tolu presiza duni Postu Saúde,” Venâncio Sarmento hateten.

Ministériu Saúde delega sira-nia ekipa halo observasaun direta kondisaun Postu Saúde ne’e atu harii fali Postu Saúde iha fatin seluk tanba ida agora daudaun kondisaun grave total no parte Autoridade lokal halo ona keixa hasoru kompañia  CARAME UNIP.Lda ba Tribunal Suai nian.

Projetu konstrusaun Postu Saúde iha Suku Biseuk, Postu adminitrativu Tilomar, ne’ebé kaer hosi Kompañia CARAME UNIP, LDA ho nia totál $295,785,42.

To’o notísia ne’e publika seidauk hetan konfirmasaun direta hosi empreza ezekutór ba projetu postu saúde, CARAME UNIP, LDA. 

Jornalista: Tome da Silva