Hatutan.com, (29 Maiu 2025), Díli- Aventura sira hosi fujitivu Arnolfo Teves Jr hotu ona iha Timor-Leste hafoin tinan-rua dada iis ho anin fresku iha Díli, Timor-Leste.

Lee Mós: Departamentu Justisa Filipina Mobiliza Ekipa Konjunta Hodi Fasilita Simu Fujitivu Arnolfo Teves Jr

Fujitivu Arnolfo Teves Jr depota ona ba nia nasuan orijen Filipina, Kinta (29/05/2025). Foto/Zita Menezes

Governu Timor-Leste ho Governu Filipina, Kinta (29/05/2025), asina  ona  akordu estradisaun  iha Sala VIP Aeroportu Internasionál Nicolau Lobato,   hodi sai baze halo estradisaun ka deportasaun ba fujitivu Arnolfo Teves Jr ba nia nasaun orijen Filipina.

Fujitivu ho estatutu red notice hosi Organizasaun Internasionál Polísia Kriminál (INTERPOL, sigla ingles) ho naran kompletu Arnolfo “Arnie” Alipit Teves Jr ka Arnolfo Teves Jr nia aventura mai Timor-Leste loron la fiksa, fulan-Abríl 2023  ho aviaun jet privadu hamutuk ho nia feen no oan-feto.

Bainhira Arnolfo Teves Jr ne’ebé sai hanesan autór bá kazu omisídiu oioin iha provínsia Negru Oriental, Filipina, to’o iha Aeroportu Internasionál Prezidente Nicolau Lobato, Díli, simu ho “onra” direta hosi asesór prinsipál balun hosi órgaun Estadu Repúblika Demokratika Timor-Leste (RDTL) nian. 

Durante halo aventura iha  Díli-Timor-Leste,  Arnolfo Teves Jr hela iha fatin oioin iha Dili, inklui fatin elite balun. Nia  halo esforsu oioin atu bele hetan azilu polítika, inklui halo komunikasaun ho figura importante balun iha Timor-Leste  atu bele fasilita nia tama Eropa, maibé esforsu sira-ne’e la konsege no la hetan aseitasaun.   

Arnolfo Teves Jr obrigatóriu kumpre desizaun polítika hosi Estadu Timor-Leste hodi halo estradisaun ba nia iha loron, 29 fulan-Maiu, tinan ne’e.

Estradisaun Arnolfo Teves Jr ne’e  simu diretamente husi autoridade Filipina nina iha Aeroportu Internasionál Prezidente Nicolau Lovbato no transporta  ho aviaun Philippine Air Force, hale’u tuku 14:12 Oras lokal Timor-Leste nian.

Hafoin fujitivu Arnolfo Teves Jr, sai husi Sala VIP Aeroportu Internasionál Prezidente  Nicolau Lobato ho liman ain kesi-metin ho korrente  nia tanis ho hakru’uk no hato’o hela de’it liafuan ikus mak obrigadu.

Autoridade Timor Leste liuhosi Polísia Migrasaun Timor-Leste nian, Tersa kalan (27/05/2025), halo kapturasaun no detesaun ba fujitivu Arnolfo Arnie Teves Jr iha nia rezidénsia iha Metiaut-Díli hodi kumpre mandadu husi Ministru Interiór Timor-Leste nian. 

Hanesan informa nanis ona, katak iha loron 20 fulan-Marsu 2025,  Supremu Tribunál Justisa  (STJ) Timor-Leste nian deside indefere pedidu estradisaun ne’ebé hato’o husi Governu Filipina ho nune’e Arnolfo Teves Jr sei la hetan estradisaun.

Arnolfo Teves Jr  sai hanesan autór bá kazu omisídiu oioin iha provínsia Negru Oriental, Filipina, ne’ebé hakotu ema na’in-sia (9) nia vida inklui Governadór  Negru Oriental, Roel de Gamo.

Iha Kinta-loraik,21 fulan-Marsu 2024, hale’u tuku 16:00 Otl,  Arnolfo Teves Jr hetan kapturasaun no detensaun  hosi autoridade Polisiál Timor-Leste bainhira halimar hela golf iha Metiaut, Díli.

Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera  Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.

Antigu lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés)  iha fulan-Fevereiru 2023. Notifikasaun  red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.

Marka prezensa iha prosesu estradisaun Arnolfo Teves Jr iha Aeroportu Internasionál Prezidente Nicolau Lobato ba hikas nia nasaun orijen Filipina ne’e asiste direta husi Ministru Justisa Sergio da Costa Hornai no mós Diretór Nasioná  Polisia Sientífiku Investigasaun Kriminál (PCIC, sigla portugés), Vicente Fernandes e Brito, Embaixadora Filipina mai Timor-Leste, Maria Anne ho autoridade Polísia Timor-Leste nian balun.

 Jornalista Estajiária : Zita Menezes