Hatutan.com, (10 Setembru 2025), Díli-Kreda Timor-Leste, Kuarta (10/09/2025), selebra misa asaun ba grasa hodi hanoin hikas tinan ida vizita apostóliku Papa Francisco mai Timor-Leste, iha loron 09-11 fulan-Setembru 2024.

Lee Mós: 10 Setembru, Misa Agradesimentu Tinan-ida Papa Francisco Vizita Timor-Leste

Sarani sira partisipa iha misa asaun ba grasain tinan ida vizita Papa Francisco vizita Timor-Leste iha Tasi-Tolu, Kuarta (10/09/2025). Foto/Zita Menezes

Iha misa asaun da grasa ne’ebé preziden husi Mgr. Virgílio Kardeál do Carmo da Silva SDB, ne’e fó hikas saranu rihun resin ne’ebé halibur malu iha Dili ho entusizmu no domin boot simu prezensa Papa Francisco nian hodi rekoñese fatin Tasi-Tolu sai sasin ona eventu istóriku boot rua, la’ós hatudu de’it ema Timor nian fiar, maibé mós koloka barak rai Timor nian fiar bá mundu nian.

Eventu istóriku bá dahuluk maka vizita Amu Papa João Paulo II nian iha tinan 1989, hatudu bá mundu  tomak katak povu Timor, povu fiar na’in, povu ne’ebé hatene luta bá nia autodeterminasaun.

Dom Virgílio Kardeál do Carmo da Silva, SDB  hateten iha Papa João Paulo II nian vizita ikus mai Timor-Leste simu grasa ukun rasin aan ne’ebé halo povu Timor moris iha roman liberdade iha  nian rai rasik.

Eventu istóriku bá daruak nian maka Papa Francisco nian vizita mai rai Timor iha loron 09-11 fulan-Setembru 2024, Timor dala-ida tán hatudu bá mundu katak, rai ki’ik ida-ne’e, iha liu rohan mundu nian, iha roman fiar Katólika nian ne’ebé nabilan daudaun iha kontinente aziatikú nian laran.

“Ohin ita hamutuk nu’udár porsaun ki’ik ida husi povu Maromak nian iha rai Timor, hamutuk nu’udár kreda ida hodi hasa’e bá Maromak, santa misa asaun da grasa ida hodi selebra primeiru aniversáriu vizita Papa Francisco nian,” Bispu Arkidioseze Metropolitana Dili, Dom Virgílio Kardeál do Carmo da Silva SDB,  hateten iha nia omília.

Nia hateten vizita Papa Francisco  ne’ebé hatudu duni katak Maromak hanoin no haraik bensaun mai sarani Timoroan  liuhosi prezensa paterna Papa Francisco ninian,  nia mai hodi hametin Timoroan  nian fiar bá Maromak, haboot nia esperansa bá loron aban no haburas nian karidade bá malu.

Misa Asaun ba Grasa iha Tasi-Tolu hodi hanoin hikas tinan ida vizita Papa Francisco mai Timor-Leste. Foto/Zita Menezes

Papa Francisco haree hetan roman ida-ne’e iha Timoroan sira nian fiar, iha labarik sira, iha foin-sa’e sira, katuas-ferik sira, roman evanjelu nian maka sai roman bá sarani nia kultura, hodi nune’e, valor evanjellu nian bele moris no hola isin iha  Timoroan nian fuan, hodi transforma sarani Timoroan hodi  bele moris fiar ida de’it ne’ebé ho ilas Timoroan nian.

“Papa Francisco iha loron ne’ebé ami hanoin ita nia vizita iha ami  rain, ami husu ita iha Lalehan harohan fatin mai ami Timoroan sira atu ami moris iha dame no domin, unidade no fraternidade no ami bele hamoris no haburas valor evanjellu nian iha ami nian kultura,” Dom Virgílio Kardeál do Carmo da Silva hateten.

Tuir observasaun Hatutan.com iha terrenu, sarani Katoliká barak entusiasmu hodi partisipa iha misa agradesimentu anivérsariu tinan-ida vizita Amu Papa Francisco, iha Tasi-Tolu  no hetan seguransa másimu hosi Polísia Nasionál Timor-Leste (PNTL).

Jornalista : Zita Menezes