Hatutan.com, (09 Dezembru 2021), Díli—Deputadu sira iha Parlamentu Nasionál (PN), aprova proposta adisionál ida ho númeru 39, kona-bá apoiu subsídiu $1, ba estudante iha Eskola Ensinu Báziku Sentrál (EBC) no Sekundáriu sira iha territóriu Timor-Leste (TL), durante fulan sanulu-resin-ida (11).

Proposta hosi Deputadu Bankada KHUNTO, António Verdial.

Propósta ne’e hato’o hosi deputadu proponente hosi bankada Kmanek Haburas Unidade Nasional Timoroan (KHUNTO), António Verdial, iha plenária PN, Kinta (09/12/2021).

“Rezultadu votasaun, a favór 37, kontra 0, abstensaun 27,” Prezidente Parlamentu Nasionál (PPN), Aniceto Lopes Guterres, deklara rezultadu votasaun ba proposta 39.

Aniceto Guterres esplika proposta sira ne’ebé aprova tiha ona, en prinsípiu kobre ho orsamentu hamutuk millaun $25.

Justifikasaun kona-bá proposta adisionál hosi bankada KHUNTO ne’e, tanba proposta iha Orsamentu Jerál Estadu (OJE) 2022 la sufisiente ba atividade sira hanesan atu fó “bolsa ensinu primáriu sira” no “konsesaun eskolár ba eskola sekundária jerál sira”.

Ho efeitu hosi proposta ida ne’e maka, atividade sei sai importante tanba permite hodi bele sosa materiál no elementu sira didátiku nian, nune’e bele iha funsionamentu ba tinan letivu sira. 

Ministru Edukasaun Juventude no Desportu (MEJD), Armindo Maia, dehan, ko’alia kona-bá proposta 39, pozisaun hosi MEJD ninian, katak sira aseita proposta ida-ne’e, kona-bá adisionál ba konsesoens eskoláres.

“Ami apresia ho proposta 39 hosi proponente, tanba tuir manuál konsesoens eskoláres ne’ebé aprova iha 2017, agora sei vigóra, atu fó konsensoens eskoláres, subsídiu ba estudantes ensinu báziku ho sekundáriu, durante fulan 11. Orsamentu ne’ebé mak iha, ita haree katak, prevee de’it orsamentu balun ba fulan ualu, balun fulan sia. Tanba ne’e mak ami konkorda ho ida ne’e, osan la’ós barak maibé dolár $1 de’it, pur estudante, pur més,” Armindo Maia esplika.

Maski ho montante osan ne’ebé  kiik, MEJD espera katak tinan oin laiha ona pandemia Covid-19 no eskola sira sei funsiona normalmente, sei laiha suspensaun ba prosesu aprendizajen hanesan akontese ona.

Jornalista: Rogério Pereira Cárceres