Hatutan.com, (09 Dezembru 2021), Díli— Prezidente Repúblika (PR), Francisco Guterres Lú Olo, fó Prémiu Direitus Umanus “Sergio Vieira Mello” ba edisaun-14 ba makmanán na’in-haat.

Makmanán na’in-haat  durante ne’e hatudu ona sira-nia dedikasaun hodi promove, defende no divulga direitus umanus iha Timor-Leste (TL).

Liuhosi Dekretu Prezidente Repúblika númeru 108/2021, 09 Dezembru, Xefe Estadu fó Prémiu Direitus Umanus “Sergio Vieira de Mello” ba manan-na’in ho kategoria Direitus Sosiais, Ekonómikus no Kulturais ba individuos, Alexandre Rosa Bruno Sarmento no Paulina da Costa Soares,  no ba organizasoins, Orfanatu Dominicana no Casa Vida, Centro de Cuidado às Crianças.

Anualmente, Prezidente Repúblika loke oportunidade ba sidadaun timoroan no estranjeiru husi organizasaun governamentais no la’ós governamentais atu hatama sira-nia kandidatura ba Prémiu Direitus Umanus “Sergio Vieira de Mello” tuir kritériu sira ne’ebé estabelese.

“Hafoin Conselho de Agraciamentos e Ordens Honoríficas halo análize, apresiasaun no vizitas ba fatin implementasaun atividade hosi kandidatu sira, órgaun konsultiva ne’e sei hato’o ba Prezidente Repúblika atu deside manán-na’in ba Prémiu,” Komunikadu hosi Prezidensia Repúblika.

Prémiu Direitus Umanus “Sergio Vieira de Mello” harii ho Dekretu-Lei númeru 15/2009, 18 marsu, atu rekoñese no destaka atividade sidadaun timoroan no estranjeiru, husi organizasaun governamentais no la’ós governamentais, ba promosaun, defeza no divulgasaun Direitus Umanus iha Timor-Leste.

Prémiu Direitus Umanus “Sergio Vieira de Mello” fahe ba kategoria Direitus Sosiais, Ekonómikus no Kulturais no kategoria Direitus Sivis no Polítikus.

Prezidente Repúblika sei atribui Prémiu Direitus Umanus Sergio Vieira de Mello ba manán na’in sira aban, 10 dezembru 2021.  Kada manán na’in sei hetan prémiu ho valór osan $ 10.000.

Jornalista: Rogério Cárceres