Hatutan.com, (23 Janeiru 2026), Díli- Membru Parlamentu Nasionál husi    Bankada CNRT, Virginia Ana Belo, kritika Primeiru-Ministru Kay Rala Xanana Gusmão ho nia  membru Governu sira ne’ebé daudaun ne’e sa’e karreta luxu iha povu ne’ebé barak sei mukit.

Karreta Prado membru Governu sira-nian estasiona iha Palásiu Governu. Foto/Zita Menezes

Iha ámbitu audénsia Komisaum C Parlamentu Nasionál ho Governu hodi deskuti kona-bá  Konta Jerál Estadu ba tinan 2024 ho 2025 iha PN, Sesta (20/01/2026), Deputada Virginia Ana Belo, hateten ikus-ikus ne’e, PM Xanana ho nia membru Governu sira sa’e karreta luxu ho marka Toyota Prado tinan produsaun 2024 ka 2025 ne’ebé kada unidade nia folin besik US$80,000.00.

“Ha’u hakarak ko’alia karreta, oras ne’e, sosiédade inklui Deputadu sira, ami preokupa loos tanba iha tinan 2025 kuandu Governu hahú sosa karreta barak no luxu, deskulpa ba termu ne’e mais Ministra, ho  Vise Primeiru-Ministru, karreta ba membru Governu sira ne’e luxu tebe-tebes,“ Deputada Virginia Ana Belo hateten.

Membru Bankada CNRT ne’e afirma  sé Governu sosa  karreta luxu sira ne’e sei fó implikasaun ba Fundu Petroliferu ne’ebé kada tinan Governu foti hodi sustenta manutensaun ne’ebé sei uza ba karreta estadu ne’e presiza osan boot.

Nia hateten katak nia kestiona asuntu ne’e la’ós tanba  laran-moras ba Governu sira sosa karreta luxu hodi uza ba servisu, maibé tuir loloos  atu sosa karreta presiza haree didi’ak lai tanba oras ne’e governu hola karreta ba membru Governu ho eskultu sira kuaze hanesan de’it.

“Ami la hatene atu halo diferensa, karreta ba membru Governu no eskoltu sira mak ida ne’ebé, tanba luxu  hanesan de’it, eskoltu sira mós sa’e karreta hanesan Primeiru-Ministru nian, labele hanoin ami laran moras tanba ami la hetan karreta mésmu tuir lolos ami mós iha direitu ba karreta,” nia tenik.

Deputada ne’e husu governu atu halo jestaun ba utiliza ba patrimóniu estadu nian,  tanba kustu manutensaun ba karreta sira ne’e presiza orsamentu ne’ebé boot.

Membru governu ne’ebé partisipa iha audénsia ne’e mak  Vise Primeiru-Ministru no Ministru Koordenador ba Asuntu Ekonomiku no Ministru Turizmu no Ambiente, Francisco Kalbuadi Lay, Ministru Planeamentu Investimentu Estratéjiku (MPIE) Gastão de Sousa, Ministru Petroleu no Rekursu Minerál (MPRM), Francisco Monteiro, Ministra Finansas (MF) Santina Cardoso, Ministru Transporte no Komunikasaun (MTK) Miguel Marques Gonçalves Manetelu ho mós Ministru Komersiu Industria (MCI), Nino Pereira.

Jornalista : Zita Menezes