Hatutan.com, (03 Fevereiru 2026), Díli-Kandidaru ajente foun Polísia Nasionál Timor-Leste hamutuk na’in-10.595, kompostu husi mane 7.716 ho feto 2.881 aprovadu ba faze teste médiku iha Ospitál Nasionál Guido Valadares (HNGV) hodi konkore ba vaga 400.

Lee Mós: Komisaun Rekrutamentu PNTL Simu Dokumentu Kandidatu Sira 4.428

Kandidatu PNTL sira tuir teste fiziku. Foto/Juvinal Cabral dos Santos

Portavós Komisaun Juri bá  Rekrutamentu  membru PNTL tinan 2025, Superintendente Polísia António da Luz, Tersa (03/02/2026), liuhosi konferénsia imprensa iha Sentru Formasaun Akademia Polísia, informa  prova kulturál, aptidaun fiziku, psikolojia no entrevista profesionál ne’ebé kandidatu sira hetan aprovadu mane 7.716 no feto 2.881 hamutuk hotu na’in-10.597  aprovadu hodi kontinua ba teste médiku ne’ebé aplika eleminatóriu.

Superintendente Polísia António da Luz, haktuir data taka sai lista kandidatu PNTL iha  Kuarta 04  fulan-Fevereiru 2026, nune’e husu kandidatu sira bele ba haree oráriu teste médiku nian ne’ebé taka iha komandu munisípiu ida-idak nian.

Kandidatu ajente foun PNTL ne’ebé la aprovadu totál mane 1.787 no feto 490 hamutuk  na’in-2.277 (reprovadu).

Rezultadu sira kada munisípiu mak  nian nian mak hanesan;

• Aileu aprovadu mane 48, feto 234 hamutuk 718 no sira la aprovadu  mak mane 94, feto 26  hamutuk 120 (reprovadu).
• Ainaro aprovadu mane 446, feto 141, hamutuk 587 (aprovadu), la aprovadu maka mane 122, feto 19 hamutuk 141 (reprovadu).
• Ataúru aprovadu mane 63, feto 16 hamutuk 79, la aprovadu mane 6, feto ida totál 7 (la aprovadu).
• Baukau aprovadu mane 575, feto 147, totál 722, la aprovadu mane 35, feto 7, totál 42.
• Bobonaro aprovadu mane 503, feto 182 totál 685, la aprovadu mane 66, feto 22 totál 88.
• Covalima aprovadu mane 424, feto 124 totál 548, la aprovadu mane 112, feto 7 totál 119.
• Munisípiu Díli Sentru Formasaun Polísia (CFP-sigla portugés) aprovadu mane 2069, feto 945 totál 3014, la aprovadu mane 523, feto 154 totál 677.
• Ermera aprovadu mane 719, feto 262 totál 98, la aprovadu mane 204, feto 69 totál 273.
• Lautém aprovadu mane 374, feto 136 totál 510, la aprovadu mane 55, feto 22 totál 77.
• Liquiça aprovadu mane 340, feto 135 totál 475, la aprovadu mane 136, feto 48 totál 184.
• Manatuto aprovadu mane 397, feto 155 totál 552, la aprovadu mane 107, feto 29 totál 136.
• Manufahi aprovadu mane 429, feto 138 totál 567, la aprovadu mane 107, feto 29 totál 136.
• Rejiaun Administrativu Espesiál Oé-cusse Ambeno (RAEOA) aprovadu mane 402, feto 119 totál 521, la aprovadu mane 122, feto 31 totál 153.
• Viqueque aprovadu mane 491, feto 147 totál 638, la aprovadu mane 98, feto 26 totál 124.

Teste fiziku ba kandidatu PNTL sira. Foto/Juvinal Cabral dos Santos

Portavós Komisaun Juri bá  Rekrutamentu  membru PNTL 2025, Superintendente Polísia António da Luz, informa ba kandidatu sira ne’ebé aprovadu ho valór másimu kada munisípiu tuir kuota ne’ebé terminadu sei mai teste médiku tuir oráriu ne’ebé mak fó sai  iha loron 10 Fevereiru 2026,  hahú ho Munisípiu Aileu na’in-20, Ainaro na’in-25, no Ataúru na’in-10.

Iha loron tuir mai, 11 Fevereiru 2026, Munisípiu Baucau kandidatu na’in 40, Bobonaro na’in-20.

Iha loron  12 Fevereiru 2026 kontinua Bobonaro na’in-20, Covalima na’in-25, Díli ka CFP na’in-15.

Loron 13 Fevereiru 2026 nafatin munisípiu Díli na’in-25, Ermera  na’in-37.

Munisípiu Lautém ba prova médiku iha  loron  16 Fevereiru 2026,  na’in-27, Liquiça na’in-26.

Manatuto tuir teste médiku iha loron 17 Fevereiru 2026 hamutuk  na’in-25,  inklui mós na’in-25 husi Munisípiu Manufahi.

Ikus liu mak RAEOA na’in-25 no husi Munisípiu Viqueque  na’in-35 tuir teste médiku iha loron 18 Fevereiru 2026.

Portavós rekrutamentu PNTL  hateten, tempu ba teste médiku nian tuku 04:30 dadeer Otl, kandidatu sira aprezenta aan iha Sentru Formasaun Polísia (CFP-sigla Portuges) Comoro. Nune’e, oras tuir mai, tuku 05:15 dadeer Otl,  Polísia sei transporta kandidatu sira ba iha HNGV hodi tuir teste médiku nian.

Superintendente Polísia António da Luz, informa, kandidatu sira ne’ebé atu mai tuir teste médiku mak detekta moras tuir rezultadu médiku, mak sei bolu fali kandidatu ne’ebé naran tuir mai, tuir kuota kada munisípiu nian.

Nia dehan, kandidatu PNTL sira ne’ebé atu mai tuir teste médiku sei lori dokumentu komprovativu mak hanesan, resibu prova kulturál nian, kartaun eleitorál orijinál ka billete identidade orijinál, resibu teste entrevista profesionál ne’ebé asina husi intervistador sira, kandidatu ne’ebé mak la lori dokumentu komprovativu sira hanesan temi ona ne’e médiku sei la atende no konsidera la aptu.

Jornalista: Juvinal Cabral dos Santos