Hatutan.com, (10 Dezembru 2021), Díli– Tribunál Distritál Díli (TDD), Sesta (10/12/2021), hala’o primeiru julgamentu arguida LCA tanba deskonfia halo kobransa ba ema balun bainhira trata dokumentu ofisiál sira  iha Notariadu Munisípiu Díli.

Arguida LCA hanesan Funsionária Publika iha Notariadu Munisípiu Díli, deskonfia  halo kobransa ba ema sira ne’ebé trata dokumentu ho lalais iha Notariadu, hanesan Sertidaun RDTL, Billete Identidade (BI), Sertidaun Óbitu no seluk tan.

Iha mós arguida ida tán ho inisiál JFC hanesan sidadaun baibain ne’ebé haklaken mensajen husi arguida LCA katak se maka hakarak trata dokumentu hanesan BI ho Sertidaun RDTL no Sertidaun Óbitu ho lalais bele liuhusi arguida LCA.

Iha primeiru julgamentu ne’e, arguida JFB deklara katak nia parte la simu osan husi ema sira ne’ebé Ministériu Públiku (MP) aprezenta hanesan José Cardoso ho Saturnino Soares hodi trata BI no Sertidaun RDTL no nia mós la koñese arguida LCA hanesan funsionáriu Notariadu Munisípiu Díli.

Arguida JFB rekoñese katak nia ba duni iha edifísiu Notariadu Munisipiu Díli, maibé ho objetivu atu ba trata sertidaun Óbitu, la’ós hanesan arguida LCA nia ema.

Hafoin rona arguida juiz preside deside adia fali julgamentu ba loron seluk hodi kontinua rona arguida LCA.

Tuir akuzasaun husi Ministériu Públiku katak iha loron 25 fulan-Marsu 2019, lezadu José Cardoso ho Saturnino Soares ba Edifísiu Notariadu Munisípiu Díli iha tuku 3:00 madrugada ho intensaun hodi hetan númeru formuláriu ba BI ho Sertidaun RDTL, maibé mézmu ba sedu maibé Ia konsege hetan númeru formuláriu BI ho Sertidaun RDTL, tanba ema barak maka ba forma sedu liu sira, ho nune’e Jose Cardoso protesta hodi fó hatene ba seguransa ne’ebé maka altura ne’ebá iha katak tanba-sá sira Ia hetan númeru formuláriu, tanba lakon tempu barak ona no momentu ne’ebá seguransa hateten ba José Cardoso ho Saturnino katak hein de’it.

Bainhira funsionáriu Notariadu sira atende tiha ema 40 ne’ebé maka iha ona númeru Formuláriu ne’e to’o tuku 12H30, karik sira sei iha tempu sira sei kontinua atende fali.

Ho nune’e sira mós hein duni to’o tuku 12H30 no kuandu sira forma hela, sira-nia kolega ho naran Daniel hateten no hatudu ba sira katak mana ida hatais kamiza loreng, kalsa mean no uza pasta kór-kafé ne’e bele trata lalais dokumentu sira hanesan BI no Sertidaun RDTL ne’ebé refere ba arguida JFB, tanba ne’e Saturnino ho José Cardoso lao tuir kedan arguida JFB.

Momentu ne’ebá Saturnino entrega telefone ba José Cardoso hodi atu grava aktu ne’ebé  mak halo husi arguida JFB ba joven na’in-haat (4) hodi haruka joven na’in-haat ne’e ba kopia  dokumentu no entrega hamutuk ho osan ba arguida hodi lori tam aba funsionáriu Notariadu nian.

Iha loron 26 fulan-Marsu 2019, purvolta tuku 09H00, Saturnino ho nia kolega José Cardoso hato’o kedan kestaun ne’e ba iha Komisaun Anti-Korrupsaun (CAC), no tuir mai investigadór CAC hamutuk ho Saturnino ho José Cardoso halo kedan planu, no Investigadór ho naran Euclides entrega osan $20, ba sira na’in-rua   hodi kontaktu ba arguida JFB hodi finje atu trata Sertidaun RDTL ho BI.

Liu husi telephone, ikus mai Jose Cardoso ho Saturnino hasoru malu duni ho arguida JFB iha Edifísiu Notariadu Díli no iha hasoru malu ne’e arguida dehan katak nia servisu iha notariadu no promote trata sira nia dokumentu no sertidaun RDTL no BI ho tempu ne’ebé lais.

Arguida LCA mós promote bele hetan kedan blanku BI, mezmu altura ne’ebá Notariadu fó sai ona ba públiku katak blanku ba BI estoke hotu, maibé arguida garantia ba sira katak liu husi nia sira hetan kedan blanku naran katak sira selu osan ho montante $20 kada ema.

Maske nune’e iha momentu ne’ebá Saturnino kontinua ko’alia ho arguida hodi entrega dokumentu ho osan $20 ba arguida.

Hafoin tuir mai investigadór husi CAC halo kedan detensaun ba arguida JFB ho Saturnino hodi lori ba aprezenta iha CAC.

Husi informasaun ne’ebé maka hetan husi arguida JFB katak nia hetan  atendimentu direita husi arguida LCA nu’udar funsionária iha Notariadu Munisípiu Díli, tanba arguida JFB fó ona osan dala tolu ba Arguida LCA hodi trata dokumentu ho lais, maibé tenke selu ho montante kada sertidaun $20.00

Ho hahalok arguida nain rua nian, MP akuza arguida sira ba pratika krime korrupsaun ativa, no korrupsaun pasiva ba aktu ilísitu ne’ebé previstu iha artigu 294 no 293 hosi kódigu penal Timor-Leste.

Jornalista: Carmelita Isaac