Hatutan.com, (07 Abríl 2026), Díli-Komandante Jerál Polísia Nasionál Timor-Leste (PNTL) Komisáriu Asisténte Afonso dos Santos haktuir  mata dalan lima ba membru polísia sira atu servisu tuir lei no regulamentu sira implementa ho loloos no justu iha  institusaun PNTL.

Komisáriu Asistente Afonso dos Santos kaer liman ho komandante PNTL sira iha ámbitu formatura jerál iha Kuartel Jerál PNTL, Tersa (07/04/2026). Foto/Juvinal dos Santos Cabral

“Ita nia misaun hanesan membru Polisia Nasional mak atu garante ordem públika, proteje vida no propriedade sidadaun sira, no asegura katak lei no regulamentu sira implementa ho loloos no justu.Tanba ne’e, iha oportunidade ida ne’e, ha’u hakarak fó énfase liu tan ba área estratéjika lima neʼebé tenke sai hanesan prioridade prinsipál iha ita nia servisu loron-loron. Primeiru, Polisiamentu Komunitaria.  Ida ne’e importante tebes atu harii relasaun neʼebé forte entre polisia no komunidade,” Komisáriu Asisténte Polísia Afonso dos Santos iha nia diskursu bainhira prezide parada jerál fulan-Abríl nian  iha Kuartel Jerál PNTL, Segunda (07/04/2026).

Komisáriu Asistente Afonso  dos Santos subliña nu’udar polísia  tenke sai hanesan parseiru ba povu, labele de’it hanesan forsa ne’ebé atua bainhira problema mosu, komunikasaun efetivu no kolaborasaun di’ak.

Komandante hatutan, parte daruak mak investigasaun Kriminál. Servisu investigasaun tenke halo ho padraun profesional ne’ebé aas, respeita prinsipiu legalidade, objetividade no transparensia. Kada kazu tenke trata ho seriedade, bazeia ba evidénsía no prosedimentu ne’ebé loos, atu asegura katak justisa bele hetan no konfiansa públiku bele aumenta.

Datoluk mak kontrolu Tráfiku Rodoviaria, Seguransa iha estrada mak parte importante ida husi seguransa públika.

“Tan ne’e, ita tenke hasa’e disipliña iha kontrolu tráfiku, implementa lei ho rigor no edukasaun ba sidadaun sira atu prevene asidente no salva vida ema barak”, komandante jerál PNTL hateten.

Nia afirma parte  dahaat, husu intelijénsia Polisiál servisu di’ak liu tan. Informasaun mak sai hanesan base importante ba desizaun operasionál.

“Ita tenke reforsa kapasidade intelijensia atu deteta ameasa sira ho sedu, prevene krime no garante estabilidade sosial no seguransa nasional. Servisu ida ne’e presiza halo ho profesionalizmu, sigilu no responsabilidade aas,”Komisáriu Asistente Afonso dos Santos esplika.

Parte  lima  mak  patrulla Polisiál. Prezensa polísia iha terrenu iha tempu hotu mak fatór importante ida atu prevene krime no fó sentimentu seguransa ba komunidade.

“Patrulla tenke halo ho planeamentu di’ak, regularidade no prontidaun atu responde ba situasaun ruma neʼebé mosu”, nia afirma.

Komisáriu Afonso salienta, atu hametin área estratéjika sira ne’e sei la bele realiza se la iha valór fundamentál sira iha ita nia an. Tan ne’e, hakarak subliña fila fali importansia a husi profesionalizmu, atu halo servisu ho kompeténsia, étika no integridade aas, disipliña, atu tuir regra, norma ho rigór no konsisténsia lealdade, atu fiel ba instituisaun, lideransa no nasaun no responsabilidade, atu prontu simu konsekućnsia ba kada asaun no desizaun ne’ebé halo.

“Ita hotu tenke komprende katak hanesan membru Polisia Nasional Timor Leste, la’ós de’it hanesan profisáun ida, maibé mos vokasaun ida atu servisu ba povu no nasaun ho dedikasaun tomak. Konfiansa públiku ba instituisaun ne’e depende ba ita nia atitude, integridade no maneira servisu loron-loron,” Komadante jerál PNTL ne’e rekomenda.

Jornalista: Juvinal Cabral dos Santos