Hatutan.com, (12 Dezembru 2021), Díli-Lider Karizmátiku nu’udar mós Komandante Em-Xefe FALINTIL, Kay Rala Xanana Gusmão, la tuur nonook iha nia uma-mahon Lecidere, Díli, bainhira komunidade afeta inundasaun kauza husi udan-boot.

Notísia iha Relasaun: Bee-Nalihun iha Estádiu Díli, Jogu Karketu Vs Lalenok Adia

Xanana Gusmão orienta hela juventude sira hamoos valeta iha uma-tatiis konventu Madre Canosiana, Balide, Dili, Domingu (12/12/2021). Foto/Hatutan.com

Inundasaun iha loron  4 Abríl liubá, Prezidente Repúblika  periodu 2002-2007 ne’e, halo esforsu hotu tuun ba ajuda komunidade ne’ebé afeta inundasaun iha Díli no iha fatin balun tan iha munisípiu.

Nia ba rasik haree ho matan no kaer ho liman hodi ajuda komunidade sira hosi bee-nalihun no tahu-laran ne’ebé rezulta husi udan-boot no rai-halai tempu ne’ebá. Nia mós lori rasik apoiu nesesidade báziku ba família afetadu sira iha Díli laran no haruka mós ba minisípiu balun, liuliu Postu Administrativu Laclo, Munsípiu Manatuto ne’ebé komunidade balun lakon vida.

Udan oras ida liu iha territóriu nasionál no iha kapitál Díli, Domingu loraik (12/12/2021), Xanana ho kalsa badak no kamiza riskadu tuun ba observa situasaun komunidade nian iha área Balide, Díli.

To’o iha fatin refere, Xanana tuun hosi karreta ajuda komunidade sira hamoos fo’er iha valeta-laran atu bee bele halai tuir nia dalan.

Komunidade sira iha área Balide nian, liuliu  hirak ne’ebé hela besik Konventu no Lar feminina  Madre Canosiana, Balide, ho entuziazmu-boot hamutuk ho Xanana hamoos fo’er husi valeta-laran.  

Iha atividade ne’e, Xanana ho juventude sira, inklui labarik balun, identifika tahu no fo’er nakonu iha valeta-laran hodi halo bee-nalihun sai husi valet- laran tama ba estrada no  tama ba komunidade balun nia horik-fatin.

Observasaun Hatutan.com nian iha Balide, hatudu katak joven balun no labarik sira kontente tebes hamutuk ho Xanana hamoos fo’er iha estrada protokolu área Balide nian tama to’o Konventu no Lar feminina Madre Canosiana, Balide nian.  

Iha konventu madre sira-nian, Xanana ho juventude sira, lori karon no kanuru soru fo’er no tahu sira ne’ebé taka-netik valeta ki’ik-oan sira iha uma tatiis konventu nian.  

Tuir previzaun tempu husi Serbisu Meteorolojia no Jeofízika Timor-Leste nian, katak iha Domingu (12/12/2021), sei akontese akontese udan ho velosidade as ho grau 26 selsiu iha parte loraik.

Governu liuhusi Sekretáriu Estadu Protesaun Sivíl (SEPS) mós hasai ona alerta ,antes ne’e, liuhosi meiu komunikasaun oioin, hanesan pájina ofisiál  Facebook  SEPS nian, inklui fahe mensajen SMS (Short Message Service) liuhusi operadór telekomunikasaun sira hodi fó alerta urjente katak, iha loron 9 to’o loron 12 fulan-Dezembru 2021, sei akontese udan-boot iha Munisípiu12 no Rejiaun Administrativu Espesiál Oé-Cusse Ambeno (RAEOA). Nune’e, husu atu komunidade hases-an no rai dokumentu importante ba fatin as, hamate kuadru eletrisidade banhira bee-sa’e.

To’o notísia ne’e publika seidauk hetan konfirmasaun hosi parte relevante, liuliu SEPS kona-bá uma-kain hirak maka sai vitíma inundasaun kauza husi udan-boot ne’e.  

Jornalista: Vito Salvadór