Hatutan.com, (17 Dezembru 2021), Díli—Ministériu Justisa (MJ), luihosi Polícia Ciêntífica Investigação Criminal Nacional (PCIC), durante fulan Novembru 2021, rejista karta keixa hamutuk 38 hosi komunidade, ne’ebé maioria krime sira ne’e ho tipu furtu agravadu.

Keixa ka denunsia sira ne’e, komunidade hato’o ba PCIC liu hosi ekipa servisu pikete no prevensaun kriminál.

Notísia iha Relasaun:PCIC Konklui Investigasaun ba Kazu Krime 20

Tuir Termu jurídiku, krime furtu agradvadu ne’e maka kazu na’ok ema nia sasan ka riku-soin ne’ebé ho folin boot.

Durante fulan Novembru, PCIC mós simu delegasaun kompeténsia kazu hosi Ministériu Públiku (MP) ho totál prosesu hamutuk 18. Hosi kazu 18 ne’e, krime burla mak aas liu.

“Iha Novembru nia laran, ita konsege finaliza relatóriu finál ba prosesu kriminál hamutuk 13, no ita enkamiña fila-fali ona ba MP. Ita mós halo relatóriu interkalár ho totál 18 no haruka fila-fali ba MP,” Portavós PCIC, Octavio da Costa Araújo hateten ba jornalista sira, liuhosi konferénsia imprensa, Sesta (17/12/2021).

Relatóriu interkalár katak, relatóriu ne’ebé mak seidauk finál. Normalmente kazu sira ne’ebé Ministériu Públiku delega kompeténsia ba PCIC ho determina tempu, maibé nia prosesu ba kazu sira ne’e seidauk hotu ka seidauk rona hotu hosi parte denunsiante sira ka ema sira interveniente ba prosesu ne’e, entaun halo relatóriu interkalár ba MP atu husu prolongamentu tempu.

Durante Novembru, PCIC mós ezekuta mandadu buska no aprensaun ida, hosi tribunál. Nune’e mós, ezekuta mandadu detensaun ne’ebé emite hosi Tribunal ho prosesu hamutuk neen. Maibé, prosesu ba kazu rua mak ezekuta ona no prosesu rua sei iha andamentu.

Aleinde ne’e, iha serbisu laboratóriu PCIC ninian, sira halo mós ezame ba DNA hamutuk lima, ne’ebé nia ezame inisiál halo iha Timor, maibé ezame laboratóriu, haruka ba iha nasaun Portugál.

Tuir mai, PCIC mós halo ezame Toxikolojia ho totál tolu no  ezame inisiál halo iha TL, ezame profunda ka iha laboratóriu, PCIC haruka ba iha Laboratóriu Polisia Judisiária Portugál.

Iha Novembru nia laran, PCIC halo ezame ba falsifikasaun dokumentu, totalmente halo iha Timor, tanba PCIC iha ekipamentu adekuadu.

“Ita halo ezame ba prosesu lima no ita konsege konklui ona haat ne’ebé mak ita halo ezame ba dokumentu ba jogu ilísitu sira,” Octavio da Costa Araújo informa.

PCIC mós halo ezame ba falsifikasaun konta bankária hosi banku balun Timor. Tanba ne’e, hosi dokumentu falsu sira ne’e, PCIC konsege halo ezame ona ba dokumentu haat no nia rezultadu haruka fila-fali ona ba iha MP.

Jornalista: Rogério Pereira Cárceres