Hatutan.com (17 Desember 2021) Dili—Tribunál Distritál Díli (TDD) iha loron 17 fulan ne’e, liu hosi alegasaun hosi prokuradór António Tavares, husu ba Tribunál atu aplika pena prizaun no suspensaun ba ninia ezekusaun ba arguidu na’in-rua Egídio da Silva no Jelicia Araújo, tanba hala’o atividade Arte Marsiál ne’ebé Governu bandu.

Razaun MP husu pena ne’e, tanba konsidera faktus provadu bazeia ba arguidu nia deklarasaun katak loos duni, sira treinu kalan no atu ba sa’e sabuk iha Atambua-Indonézia.

Notísia iha Relasaun:Joven Na’in-Rua Hatama Ilegál Atributu Arte Marsiál

Antes ne’e, tuir akuzasaun hosi Ministériu Públiku (MP) katak, iha tinan 2013 Governu Timor-Leste hasai rezolusaun númeru 16/2013, 10 de Jullu, deside proibisaun totál atu halo kualkér atividade arte marsiál ba grupu sira hanesan PSHT, KORK no KERA-SAKTI no rezolusaun ne’e rasik haforsa ho lei númeru 5/2017.

Arguidu Egídio da Silva no Jelicia Araújo nu’udár membru hosi grupu arte marsiál Persaudaraan Setia Hati Teratai (PSHT), ne’ebé Estadu proibi atu labele hala’o atividade no ezersísiu iha teritóriu TL.

Maski lei bandu grupu arte marsiál sira ne’e, maibé arguidu na’in-rua kontinua partisipa atividade treinamentu iha área Bairru-Pité Dili, iha tuku 20:00 to’o 22:00 semana ida dala tolu.

Iha fulan Agostu tinan 2020, arguidu na’in-rua sai hosi Dili ba Maliana ho objetivu hakat liu fronteira liu hosi dalan illegál atu ba tuir graduasaun ka sa’e sabuk iha Atambua.

Bainhira arguidu na’in-rua sai hosi fronteira Timor nian iha área Tunubibi Bobonaro, Polisia Unidade Patrullamentu Fronteira (UPF) ho membru F-FDTL kaptura arguidu na’in-rua hodi entrega ba Polisia Munisipiu Bobonaro no submete ba prosesu investigasaun.

Durante prosesu investigasaun, arguidu Egidio da Silva falsifika dadus identifikasaun hanesan loron moris, inan aman nia naran no seluk-seluktan, iha fatin investigasaun tolu ne’ebé diferente.

Ho hahalok arguidu sira-nian liga ho grupu arte marsiál ne’ebé Governu bandu, Ministériu Públiku akuza arguidu sira ba prátika krime ilísitu ba arte marsiál tuir artigu 24/1 lei númeru 5/2017, 19 Abril no falsifikasaun deklarasaun ne’ebé previstu iha artigu 278/2 hosi kódiu penál TL.

Audiénsia julgamentu prezide hosi juiz singulár Alvaro Freitas, MP reprezenta hosi Prokuradór António Tavares no arguidu sira hetan asisténsia hosi Defensór Públiku Jonas Henrique.

Jornalista: Carmelita Isaac