Hatutan.com, (30 Dezembru 2021), Díli-Husi fulan-Janeiru to’o fulan-Dezembru 2021, Komandu Polisia Nasionál Timor-Leste (PNTL),  Departamentu Tránzitu no Seguransa Rodoviária, rejista ema  (motorista-red) hamutuk na’in-56 mak lakon vida tanba kauza hosi asidente tráfegu ho sira-nia motorizada.

PNTL hala’o seguransa iha estrada públiku hodi asegura movimentu transporte iha misa kalan, 24 Dezembru 2021 iha Kapitál Díli. Foto/Media PNTL

Xefe Departamentu Tránzitu no Seguransa Rodoviária, Superintendente Polísia, João Belo dos Reis, informa, husi Janeiru to’o loron 26 fulan-Dezembru ne’e  sira rejista totál asidente tráfegu 1.418, kanek kaman iha 1.528, na’in-311 mak kanek todan, no na’in-56 seluk lakon sira nia vida (mate).

Xefe Departamentu Tránzitu no Seguransa Rodoviária, Superintendente Polísia, João Belo dos Reis, Kinta (30/12/2021), informa ba jornalista sira iha nia knar fatin,  katak bainhira halo komparasaun dadus asidente tráfegu sira ne’ebé akontese antes iha tinan sira kotuk, númeru ema mate iha Estrada, hahú hosi na’in-60 to’o na’in-100, no ida ne’e aas liu. Maibé, iha tinan 2021 ne’e, dadus asidente ne’ebé rezulta ema mate to’o de’it 56.

João Belo  hateten, hosi dadus ida ne’e, hatudu katak, Komandu PNTL liuhosi Tránzitu no Seguransa Rodoviária, konsege redús ona númeru asidente fatál iha estrada, tanba ne’e, hein katak, hahú loron 30 fulan-Dezembru ba oin, sei la akontese tán asidente fatál iha estrada públiku sira.

Prende Viatura Estadu iha Natál

Durante ámbitu selebrasaun loron Natál, 24 to’o 25 fulan-Dezembru, Polísia Tránzitu, liuhosi atividade pasa-revista iha territóriu nasionál, konsege prende viatura Estadu ka transporte Governu hamutuk lima (5), kompostu hosi karreta rua (2) no motorizada tolu (3).

Atividade apreensaun ne’e, bazeia ba lei númeru 08/2003, kona-bá utilizasaun transporte Estadu nian. Nune’e, Polísia Tránzitu hanesan fiskalizadór, iha kna’ar hodi kontrola sirkulasaun karreta ho motor Estadu nian, bainhira sirkula la tuir oras servisu.

Evidénsia sira ne’ebé prende, daudaun ne’e destaka hela iha Tránzitu Nasionál, iha Komandu PNTL Caicoli, Díli, hodi hein koordenasaun ho parte Comissão Anti Corrupção (CAC), Comissão da Função Pública (CFP), Patrimóniu Estadu, no mós Diresaun Nasionál Transportes Terrestre (DNTT), atu oinsá mak prosesu sira ba oin.

La Autoriza Uza Lampu LED

Komandu PNTL, liuhosi tránzitu, sei halo mós operasaun ba motorista sira ne’ebé utiliza lampu LED iha sira nia karreta leten no oin, tanba prejudika ema seluk nia viajen iha tempu kalan, no fó mós risku ba ema seluk vida, hodi hetan asidente ne’ebé grave.

“Xefe Departamentu Tránzitu Seguransa Rodoviária, ha’u husu ba públiku liu-liu karreta na’in sira atu voluntáriamente, hasai lampu LED hosi sira nia karreta. Tanba primeiru, sira laiha lisensa, segundu, sira kontra lei kódigu estrada, no terseiru, lampu LED ne’e hamosu perigu ba ema seluk nia vida. Sé maluk sira la hasai, maka karik tama iha operasaun, ami sei aplika multa, no posibilidade karreta ne’ebé mak sira uza, ami sei tahan, bainhira selu multa tiha mak sira bele foti fila-fali,” João Belo hateten.   

Tuir dadus hosi Departamentu Tránzitu Nasionál no Seguransa ba Rodoviária, katak, hahú iha fulan-Jullu 2021, to’o oras ne’e, bazeia ba implementasaun lei númeru 28/2017, kona-bá kontrolu sirkulasaun karreta estranjeiru ne’ebé mak tama iha territóriu nasionál  ho periodu fulan-neen (6) nia laran, polísia rekolla taxa hodi kontribui ba kofre Estadu, $56,629.

“Ida ne’e taxa ne’ebé mak hatama hosi ne’ebá, no iha fulan-Dezembru ne’e rasik, $12.205, “ João Belo informa.

Jornalista: Rogério Pereira Cárceres