Hatutan.com, (05 Janeiru 2022), Díli—Konsellu Ministru (KM) aprova ona Projetu Dekretu Governu Kona-bá Ezekusaun Orsamentu Jerál Estadu (OJE) 2022.

“Ohin dadeer, reprezenta Ministériu Finansas, ha’u aprezenta ba Konsellu Ministru Projetu Dekretu Governu Kona-bá Ezekusaun OJE 2022. Hafoin hetan deliberasaun, Konsellu Ministrus aprova ona Diploma ne’e ho desizaun mantein maioria regras hanesan tinan anteriór no halo mós alterasaun regras balun ho forma adopta regras introdús iha Lei OJE 2022 ka lejislasaun-sira relevante,” Ministru Finansa (MF), Rui Gomes hateten iha komunikadu.

Notisia iha Relasaun:OJE 2022 ho Montante Billiaun $1,95 Promulgadu

Diploma ne’e atu garantia kontrolu orsamentu ida ne’ebé rigorozu, efetivu no simplifika prosedimentu ezekusaun orsamentu ho objetivu atu fasilita ezekusaun OJE 2022, ne’ebé sei implementa hosi Órgaun no Servisu Setór Administrasaun Públiku.

Ba oin, Ekipa Tékniku sira sei prepara no ofisialmente sei distribui Pakote Fiskál Aprovadu no dissemina Dekretu Governu Kona-bá Regras Ezekusaun OJE 2022 ba Liña Ministériu, Servisu Fundu Autónoma, Instituisaun Estadu no Munisípiu sira hamutuk 98, ne’ebé mak sei implementa Programas 45 iha perímetru OJE 2022.

Iha loron 16 fulan-Dezembru 2021, Parlamentu Nasionál (PN) aprova ona iha finál globál OJE 2022 ho montante totál $𝟏.𝟗𝟒𝟗.𝟎𝟒𝟑.𝟐𝟗𝟏 ho 44 votu a favor (68%), 21 kontra no laiha abstensaun.

PN mós aprova orsamentu ba Seguransa Sosiál ho montante $299.285.500. Totál Despeza Globál $2.178.328.791.

OJE 2022 ne’e hetan ona Promulgasaun hosi Prezidente Repúblika (PR) iha loron 3 fulan-Janeiru 2022.

Alokasaun OJE 2022 tuir klasifikasaun ekonómiku – aas liu mak iha Transferénsia Públikas ho montante $715.071.939. Tuir kedan ho Bens no Servisu $466.877.382. Kapitál Dezenvolvimentu $390.177.399. Saláriu no Vensimentu $245.437.130 no Kapitál Menór $41.914.097.

OJE 2022 nu’udár kontinuidade hosi kompromisu polítiku Oitavu Governu Konstitusionál ho Timoroan sira, to’o mandatu remata iha tinan 2023.

Iha OJE 2022, Governu define ona ho loloos objetivu haat ne’ebé mak Governu hakarak alkansa iha tinan oin: 1) Atu kombate pandemia ne’ebé kauza hosi Covid-19; 2) Atu proteje sidadaun sira; 3) Atu rekopera ekonomia no kria empregu; 4) Tinan 2022 haree hanesan tinan rekoperasaun ba pandemia Covid-19.

Jornalista: Cipriano Colo