Hatutan.com, (06 Janeiru 2022), Dili—Xefe Estadu Maior Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur, hakarak kumpre estatutu militár nian, bainhira atu reforma ka rezigna aan hosi instituisaun ne’e, Governu tenke tula tán fitun-ida ba nia, hodi kompleta fitun-haat.

Lere Anan Timur dehan, tuir loloos nia lidera instuisaun F-FDTL to’o de’it mandatu dala-rua. Maibé, iha Timor-Leste buat ne’ebé akontese ba nia úniku, tanba Governu estende nia mandatu to’o dala-tolu kedan ho deviza Tenente Jenerál.

Notisia iha Relasaun:Tenente Jenerál Lere husu membru F-FDTL kuida patrimóniu Estadu

Situasaun ida-ne’e akontese, tanba depende desizaun hosi polítiku sira, liu-liu sira ne’ebé kaer hela ukun. Nia sita estatutu militár anteriór kona-bá promosaun ba deviza hatete katak, Xefe Estadu Maiór Jenerál, to’o de’it iha Maijór Jenerál. Maibe, tanba de’it Governu halo estensaun ba mandatu, ikus-mai promove nia deviza ba Tenente Jenerál (fitun-tolu).

“Iha estatutu ne’ebé iha, loron ida antes ha’u nia reforma, Governu, Estadu tenke fó tán fitun ida ba fitun haat. Ita bele dehan fitun-haat, povu nian. La’ós atu komanda forsa nian,” Tenente Jenerál Lere Anan Timur, hateten ba jornalista sira, hafoin partisipa missa Natál hamutuk iha Kuartél Jenerál Fatuhada, Kinta (06/01/2022).

Oras-ne’e Lere Anan Timur, idade atu kompleta tinan 70 ba reforma no tempu ida nia sei husik instituisaun F-FDTL, maibé nia husu ba membru sira atu labele haluha kultura respeita-malu. Alende ierárkia militár, iha mós respeitu umanu nu’udár ema.

“Ida ne’e maka, sé ha’u laiha, la hamutuk ona ho imi mós ida ne’ebé sei troka ha’u, ne’e mak preukupasaun ida-idak nian. Hanesan baibain ha’u dehan, ita troka malu la’ós atu ida ne’ebé troka ha’u, ba halo buat foun. Sé mak troka ha’u, hatutan buat ne’ebé ha’u halo seidauk hotu, kuríje buat ne’ebé ha’u husik. Labele ida mai, halo buat foun, buat ne’ebé  ha’u halo, husik tiha,” Lere Anan Timur, hateten.

Símbolu Advertisement	Deviza	Data
	Koronél FDTL	1 Fevereiru 2001 — 28 Novembru 2009
	Brigadeiru Jenerál FDTL	28 Novembru 2009 — 6 Outubru 2011
	Majór Jenerál FDTL	6 Outubru 2011 — 26 Febereiru 2021 Advertisement
	Tenente Jenerál FDTL	26 Fevereiru 2021 — to’o agora

Seidauk Prontu Kandidata aan ba PR

Lere Anan Timur deklara, to’o oras-ne’e nia parte seidauk prontu atu kandidata aan ba Prezidente Repúblika (PR), atu kompete iha eleisaun tuir-mai.

“Seidauk to’o tempu ha’u atu dehan katak prontu, até Prezidente Repúblika mós seidauk ko’alia buat ida, bainhira Prezidente dekreta ona, dehan katak, ha’u to’o momentu ida ke, ha’u sei kandidata ka la kandidata aan, depois maka ha’u sei anunsia,” nia esplika.

Jornalista: Rogério Pereira Cárceres