Hatutan.com, (24 Janeiru 2022), Dili—Liuhusi Plenária ordinária, Segunda (24/01/2022), iha Salaun Plenária Conselho de Imprensa de Timor Leste, Kintal-Boot, Dili, membru Conselho de Imprensa aprova pedidu “Direito a Dispensa do Exercício das Funções e Delegação de Competência”  husi Prezidente CI, Virgílio da Silva Guterres.

Plenária ordinária Conselho Imprensa, Segunda (24/01/2022). Foto/CI

Virgílio da Silva Guterres, hato’o pedidu “Direito a Dispensa do Exercício das Funções e Delegação de Competência” ho razaun atu konkorre iha Eleisaun Prezidensiál nu’udar kandidatu Prezidente Repúblika iha eleisaun prezidensiál ne’ebé atu hala’o iha loron 19 fulan-Marsu 2022.

Virgílio da Silva Guterres nu’udar kandidatu Prezidente Repúblika ida ne’ebé sei kompete iha eleisaun prezidensiál  ne’e. Ho nune’e,  hola desizaun tuir direitu Konstitusionál iha Artigu 75 relasiona ho elejibilidade ba kandidatu Prezidente Repúblika sira.

Liuhusi plenária ne’e mós aprova no aseita Konselleiru Expedito Loro Dias Ximenes, substitui pozisaun Prezidente Conselho de Imprensa interinu durante fulan-tolu (3) nia laran, hahú hosi loron 24 fulan-Janeiru to’o loron 24 fulan-Abríl 2022.

Advertisement

 Virgílio da Silva Guterres, nia “direito de dispensa” ne’e sei efetivu hahú loron 24 fulan-Janeiru to’o loron 24 fulan-Abríl 2022. Tanba ne’e, Virgílio da Silva Guterres sei auzente iha atividade hotu-hotu, internal ka external Conselho de lmprensa nian durante períodu refere.

“Iha períodu ha’u nia auzénsia nian, hanesan haktuir iha númeru 2, Artigu 24. Decreto Lei No.25/2015,5 de Agosto, Estatuto do Conselho de Emprensa no Artigu 1 kona-bá Regulamentu Conselho de Imprensa No. 1/2021/ 26 de fevereiru, Funsionamentu Plenáriu  Conselho de Imprensa, ha’u hatudu (indica) Konselleiru Expedito Loro Dias Ximenes, atu interinamente substitui ha’u hodi hala’o knaar sira nu’udar Prezidente Conselho de Imprensa nian, hahú hosi loron 24 fulan-Janeiru to’o loron 24 fulan-Abríl 2022,” Virgilio da Silva Guterres haktuir iha nia karta “Direito a Dispensa do Exercício das Funções e Delegação de Competência” ne’ebé hato’o ba plenária CI no koñesimentu mós ba Prezidente Parlamentu Nasional no Diretór Ezekutivu CI nian.

Durante  períodu refere, Expedito Loro Dias Ximenes sei hala’o knaar nu’udar Prezidente interinu Conselho de lmprensa ho kompeténsia tomak ne’ebé haktuir iha númeru 1, Artigu 24. Decreto Lei No.25/2015, 5 de Agosto, Estatutu Conselho de Imprensa.

Hola parte iha plenária ordinária ne’e, Virgilio da Silva Guterres, nu’udar prezidente CI, Expedito Loro Dias Ximenes nu’udar membru (atuál prezidente interinu), Benevides Correa Barros (membru), Francisco Belo Simões da Costa (membru), Otelio Ote  (membru) ho Diretór Ezekutivu Rigoberto Monteiro.

 Jornalista: Vito Salvadór

Advertisement