Hatutan.com, (28 Outubru 2021), Díli—Conselho de Imprensa de Timor Leste liuhusi plenária ordináriu, Kinta (28/10/2021),  aprova ho unanimidade votu pezár ba jornalista Max Stahl.

Konférensia Imprensa hosi Conselho de Imprensa. Foto/Hatutan.com

Plenáriu ordináriu Conselho de Imprensa deside no aprova votu pezár ne’e  hodi espresa Conselho Imprensa nia solidariedade ida kle’an no rekoñesementu boot ba kontribuisaun  Saudozu Max Stahl nian ba prosesu luta povu Timor-Leste nian ba ukun rasik aan.

“Hanesan ilustrasaun ida de’it, se Timor ne’e nia luta hahú hosi 1975, Timor-oan sira kontribui barak hanesan bee-turuk iha kopu laran no turuk beibeik, maka bee-turuk ne’ebé nakonu iha kopu-laran to’o fakar sai hosi kopu-laran ne’e, Saudozu Max Stahl nia kontribuisaun boot maka fakar sai bee-turuk ne’e hosi kopu-laran no sulin sai  ba to’o li’ur,”  Prezidente Conselho de Imprensa, Virgílio da Silva Guterres halo ilustrasaun ne’e liuhosi konferénsia imprensa hodi hato’o votu pezár ba Saudozu Max Stahl.

Ilustrasaun seluk, Virgílio hato’o kona-bá tempu-udan, anin no rai-lakan. No karik luta ne’e akontese iha timor udan, anin no rai-lakan, maka Saudozu Max Stahl hanesan rai-lakan siak ho nia tarutu ba mundu liuhosi nia obra jornalistika sira hodi halo tratu iha mundu internasionál nia tilun kona-bá Timor-oan nia luta no sofrimentu sira.

“Ita hotu lakon eroi-boot ida ba Timor nia luta. Max Stahl hanesan mós eroi Timor-oan sira seluk ba prosesu luta Timor-oan nian ba Timor nia auto determinasaun,”   Virgílio da Silva Guterres afirma.

Liuhosi konferénsia imprensa ne’e, CI rekomenda ba Estadu Timor-Leste atu bele deklara periodu lutu nasionál ida ba Saudozu Max Stahl no rekomenda ba Ministériu Administrasaun Estatál (MAE) atu deside espasu dalan ka estrada ruma hodi tau naran Max Sthal nian hodi fó onra no rekoñesimentu iha memória kontribuisaun  Max Stahl nian.

Entermu Conselho de Imprensa sei iha diskusaun atu oinsá plenáriu deside fó omenajen ba Saudozu Max Stahl liuhosi kategoria prémiu ba jornalista sira, hanesan kada tinan ne’ebé Conselho Imprensa halo iha ámbitu selebrasaun trajédia Balibo Five, 16 Outubru 1975.

“Ba Max Stahl nia espoza, nia oan-sira no família rasik, ami CI nia solidariedade profunda. Max Stahl la’ós de’it jornalista, maibé hanesan korajen hodi sai hanesan monumentu moris ba jornalista timor-oan hodi luta hasoru injustisa.   Hein katak família, espoza no oan-sira, korajen nafatin enfrenta situasaun difisil ne’e,” Virgílio Guterres afirma tan.  

Buat ne’ebé tuir CI nia haree atu jornalista timor-oan sira hotu ba nati tuir Saudozu Max Stahl maka nia domin boot ba Timor to’o nia tempu ikus nian mós nia sei dedika nia serbisu iha Timor-Leste.  

Governu Tau Atensaun As ba Max Stahl

Primeiru-Ministru, Taur Matan Ruak. Foto/Hatutan.com

Primeiru-Ministru, Taur Mantan Ruak, konfirma katak, Governu tau atensaun as ba iha Max Stahl nia mate.

Iha semana ida kotuk, família matebian komunika no deside  ona ho Governu atu lori Max Stahl nia sinza mai Timor-Leste hafoin halo prosesu kremasaun iha Austrália.

“Ami atensaun hela ho pasu saida mak família Max Stahl sei halo iha tempu tuir mai tanba ita seidauk iha informasaun ofisiál tamba ne’e Governu sei koopera no respeita hodi hein desizaun família nian,”  Primeiru-Ministru Tau Matan Ruak haktuir ba jornalista sira hafoin hasoru-malu ho Prezidente Repúblika, Frnacisco Guterres “Lú Olo” iha Palásiu Prezidensiál, Díli.

Aproveita oportunidade ne’e hodi governu Timor Leste nia naran hato’o profunda kondolénsia ba família matebian Max Stahl nian. Timor -Leste lakon jornalista seniór no amigu di’ak ida ne’ebé iha kualkér forma hamutuk ho povu Timor ba luta libertasaun.

“Korajen ba família atu akompaña situasaun ne’e ho serenidade, kalma no iha forsa,” Taur Matan Ruak hatete.

Xefe Governu ne’e hatutan uainhira família deside halo kremasaun ba mate-isin Max Stahl no lori sinza mai Timor-Leste no Governu sei apoiu tuir kbiit no kondisaun ne’ebé governu iha.

Primeiru-Ministru informa mós ba Prezidente Repúblika kona-ba sentru audio visual Max Stahl ne’ebé mós durante ne’e halo arkivasaun ba iha dokumentu sira rezisténsia timor nian ne’ebé ikus mai sai hanesan istória hodi fó sasin ba jerasaun sira ohin loron no futuru.

Governu iha planu no promote sei tau atensaun ba sira tamba sira sai mós hanesan osan mean ka rikusoin timor nian.

Jornalista seniór  ne’e sidadaun Inglaterra no Timor-Leste ho naran Cristopher Wrnner ne’ebé grava akontesimentu masakre Santa Krús, 12 Novembru 1991.

Nia  hakotu-iis iha ospitál Brisbane-Austrália tanba moras kleur no Estadu Timor-Leste konsidera Max Stahl nu’udar eroi nasionál no kondekora ho Grau Colar Orden Timor-Leste. Max Stahl, moris iha Inglaterra iha loron-6 fulan-Dezembru 1954.

Jornalista : Vito Salvador