Hatutan.com, (26 Maiu 2023), Díli—Conselho de Imprensa de Timor-Leste, Sesta (26/05/2023), atribui tan karteira profisionál bá jornalista na’in-lima (5) ne’ebé elejivel ka pasa ona iha ezame aptidaun (ezame karteira profisionál).

Lee Mós : Monitorizasaun CI Iha Pre-Kampaña Eleisaun Parlamentár: GMN TV Komete Infrasaun Étika Barak Liu

Diretór Ezekuitvu Conselho de Imprensa, rigoberto Monteiro, atribui karteira profisionál bá jornalista Aliança Gomes. Foto/Elio dos Santos da Costa

Jornalista na’in-lima ne’e kompostu hosi Aliança Gomes, jornalista hosi Rádiu Televizaun Timor-Leste, Empreza Públiku (RTTL,E.P) ho númeru identifikasaun CI/378/2023, Ernestina de Jesus Guy, jornalista hosi RTTL,E.P ho númeru identifikasaun CI/381/2023, Ósoria Américo Marques, jornalista hosi Ajénsia Notisioza Tatoli,I.P ho númeru identifikasaun  CI/380/2023, Francisco Fátima da Costa Sony, jornalista hosi Ajénsia Notisioza Tatoli, I.P  ho númeru identifikasaun CI/379/2023, ho Diana Manuela Soares, jornalista hosi Rádiu Liberdade ho númeru identifikasaun CI/382/2023.

Atribuisaun karteira profisionál ne’e  baze bá Lei Komunikasaun Sosiál  artigu 2 alínea i) “Jornalista katak profisionál ne’ebé hala’o atividade prinsipál mak jornalizmu no bainhira asesu bá profisaun, jornalista hotu iha obrigasaun kumpre kondisaun sira hotu ne’ebé haktuir iha Lei Komunikasaun Sosiál artigu 14, 15 ho artigu 16.  

Karteira profisionál ne’ebé atribui bá jornalista na’in-lima ne’e hetan aprovasaun hosi plenária Conselho de Imprensa iha loron 24 fulan-Maiu 2023.  

Dezde 2017 to’o mai 2023, Conselho de Imprensa de Timor-Leste atribui ona karteira profisionál bá jornalista sira hamutuk na’in-382. Atribuisaun títulu profisionál jornalista ne’e  bazeia mandatu Lei Komunikasaun Sosiál artigu 44 (Kompeténsia) iha alínea d)   hateten, “Conselho de Imprensa mak fó, halo foun, tahan no hasai títulu profisionál jornalista nian.”

Karteira profisionál jornalista. Foto/Elio dos Santos da Costa

Serimónia atribuisaun ne’ebé hala’o iha salaun Gonden Star, Díli, jornalista na’in-rua (2) hosi Ajénsia Notisioza Tatoli,I.P; Ósoria Américo Marques, ho  Francisco Fátima da Costa Sony auzénsia tanba sira-nia kondisaun saúde la permite.  

Partisipa iha serimónia solene ne’e, membru Conselho de Imprensa, Francisco Belo Simões da Costa, Amito de Araújo nu’udar mós membru Conselho de Imprensa, kargu xefia Conselho de Imprensa nian, Prezidente Asosiasaun Jornalista Timor Leste Press Union (TLPU), Candido Alves, prezidente Uniaun Profisionál Jornalista Timor-Leste (UPJTL),  Horacio Babo, diretór ezekutivu Rádiu Liberdade, Francisco Gari ho mós jornalista sira seluk tan.  

Jornalista Estajiáriu: Lazaro Pereira Quefi