Hatutan.com (07 Fevereiru 2022) Díli—Tribunál Distritál Díli (TDD) liu hosi leitura sentensa ne’ebé lee hosi juiz, Alvaro Maria Freitas, deside aplika pena prizaun tinan tolu, maibé suspende ba tinan ida fulan ne’en ba arguidu na’in lima hanesan Carlito Xavier, António Bere, Filomeno Mendonça, Pedro Xavier, Jaime Rodrigues, tanba baku xefe suku Dato, Munisípiu Ermera, lezadu Mateus Xavier Mendonca.

Razaun Tribunál aplika pena suspensaun ne’e, tanba faktus provadu katak, arguidu sira perténse duni ba suku ne’e, maibé hanesan komunidade baku fali autoridade lokál ne’ebé iha podér iha suku.

Tribunál esplika, arguidu na’in-lima la ba tama komarka, maibé iha liur de’it durante tinan ida fulan ne’en labele komete kualkér krime, bainhira komete maka sei ba komarka tinan ida fulan ne’en hodi kompleta pena suspensaun ne’e.

Antes ne’e, tuir akuzasaun hosi Ministériu Públiku (MP) iha loron 01 fulan Abríl tinan 2019, arguidu na’in-lima ba iha lezadu nia uma, baku rahun uma no baku lezada to’o ran sai.

Tanba ne’e, MP akuza arguidu sira ba prátika krime danu ho violénsia ne’ebé previstu iha artigu 260 hosi kódigu penál TL.

Audiénsia julgamentu iha Segunda loron 07 fulan ne’e, prezide hosi juiz singulár Alvaro M. Freitas, MP reprezenta hosi Prokuradór Jacinto Babo no arguidu sira hetan asisténsia legál hosi advogadu privadu.

Jornalista: Carmelita Isaac