Hatutan.com, (18 Fevereiru 2022), Díli- Asosiasaun HAK lansa postu reklamasaun eleitorál ho vizaun no misaun atu eleisaun justu no demokrátika ba dezenvolvimentu nasional ne’ebé dignu no sustentavel,  hasae tasa partisipasaun, sidadaun kritiku hodi halo kontrolu ba prosesu eleisaun.

Notísia iha Relasaun: Pré-Kampaña, CNE Sei Aplika Sansaun Administrativa ba Kandidatu PR no Parpól

Diretór ezekutivu Asosiasaun HAK, Sisto dos Santos. Foto/Hatutan.com

Diretór Ezekutivu Asosiasaun HAK, Sisto dos Santos, ba jornalista sira iha Edifísiu Asosiasaun HAK Faról, Díli Sesta (18/02/2021), esplika katak objetivu husi estabelesimentu postu reklamasaun eleitorál ida-ne’e mak fasilita partisipasaun sidadaun sira hodi divulga, artikula no reklama prosesu eleisaun ne’ebé justu no livre.

HAK konsidera komunidade sira iha ona kbiit atu halo advokasia ba realidade sira ne’ebé sira rasik sei enfrenta durante prosesu kampaña eleitorál, eleisaun, inklui mós ho kontajen to’o ba rezultadu eleisaun nian.

Advertisement

HAK liu husi esforsu ne’ebé iha, fó konfiansa no espasu ba sidadaun sira atu sira rasik iha esforsu hodi sai nain ba eleisaun, estadu, governu no nasaun.

“Postu reklamasaun eleitorál ne’e atu bele mós sukat to’o iha ne’ebé edukasaun sívika ne’ebé ita halo. Ida-ne’e mós momentu atu ita sukat partisipasaun sidadaun sira nian ba prosesu demokrasia,” Sisto dos Santos hateten.

Husi estabelesimentu postu reklamasaun ida-ne’e, atu suka katak eleisaun ne’e nesesidade povu nian ka eleisaun ne’e ba de’it ema sira ne’ebé atu ukun ne’e de’it.  Tamba ne’e, postu reklamasaun ida-ne’e, atu sukat mós balansu partisipasaun povu nian.

HAK  konsidera katak kada eleisaun Governu gasta osan barak, maibé la responde ba nesesidade povu nian hanesan bee-moos, agrikultura, edukasaun no saúde.

“Ita hein eleisaun ne’e atu responde dunik ba nesesidade povu nian ka eleisaun ne’e hanesan festa  de’it, ita ba kontente depois fila mai povu nia nesesidade nafatin estagnadu,” nia dehan.

Advertisement

Postu ida-ne’e la’ós  temporáriu, maibé sei nakfilak ba postu populár ida atu tau matan ba órgaun soberanu nia servisu atu povu ne’e síviku iha kritika hodi sai nain lolos ba nasaun ida ne’e.

Asosiasaun HAK husu atu sidadaun sira tenke kritiku hasoru polítiku sira liuliu kandidatu prezidensiál sira ne’ebé hahú halo kampaña hodi la respeita ba lei formal sira ne’ebé vigora iha Timor Leste.

“Ida-ne’e perigu, sidadaun tenke kritiku ba ida-ne’e no tenke reklama tamba buat balun la’o la loos ona dezde inísiu. Kampaña seidauk hahú,  maibé faktu hatudu ema hahú tiha ona,” Sisto dos Santos preokupa.

Diretur ezekutivu Asosiasaun HAK ne’e subliña defaktu la’ós Komisaun Nasionál ba Eleisaun (CNE, sigla portugés) mak fraku atu kontrolu maibé polítiku nain sira mak hatudu sira-nia inkomprimentu ba lei ne’ebé vigora.

Diretór Adjuntu Gabinete Apoiu Sosiedade Sivíl no Auditoria Sosial, Edvin Duarte Soares Noronha iha nia intervensaun hateten, lansamentu ba postu reklamasaun eleitorál ne’e importante tamba Asosiasaun HAK nia papél mak ko’alia kona-bá direitu umanu no akompañamentu ba prosesu eleisaun sira.

Advertisement

 “Postu reklamasaun ida ne’e bele enkoraja sidadaun hotu atu partisipa ativu liután iha eleisaun prezidensiál, tinan ida ne’e,” Edvin Duarte Soares Noronha hateten.

Jornalista: Vito Salvador

Advertisement