Hatutan.com, (23 Fevereiru 2022), Díli—Konsellu Ministru hala’o sorumutuk iha Palásiu Governu, iha Dili no aprova ona projetu Dekretu Governu nian, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos.

Reuniaun KM (29/12/2021). Foto/media KM.

Projetu ne’e kona-bá alterasaun dahuluk ba Dekretu Governu nian n.2/2015, loron 14 fulan-janeiru, ne’ebé aprova subsídiu akadémiku sira, bonus ba Xefia no komplementu estraordináriu sira ba pesoál dosente Universidade Nasionál Timor-Lorosa’e (UNTL) nian.

Ho alterasaun ida-ne’e, subsídiu akadémiku no komplementu espesiál ba akizisaun materiál tékniku no sientífiku sei iha efeitu retroativu sura hahú husi loron 1 fulan-Janeiru tinan 2014, hanesan ho loron hahú kálkulu bonus xefia nian.

Alende ne’e, Konsellu Ministru aprova ona projetu Rezolusaun Governu nian, ne’ebé aprezenta hosi Vise-Primeiru-Ministru no Ministru Planu no Ordenamentu, José Maria dos Reis, ne’ebé ninia objetu maka determinasaun ba elaborasaun Planu Urbanizasaun Dili nian.

Advertisement

Planu Urbanizasaun Sidade Dili nian maka planu ba uzu rai nian ne’ebé define hosi regra sira ne’ebé disiplina no orienta uzu, okupasaun no transformasaun ba rai urbanu sidade nian, hodi hatudu objetivu sira, prinsípiu sira no estratéjia sira ne’ebé asume husi Estadu, atu hadi’a kualidade ba espasu urbanu nian no promove dezenvolvimentu ba funsaun sira no atividade urbana sira.

Kria mós komisaun konsultiva ida, ne’ebé kompostu hosi Diretór-Jerál sira hosi departamentu governamentál sira ne’ebé relevante ba okupasaun no uzu territóriu, ne’ebé maka sei sai responsável ba akompañamentu traballu sira kona-bá elaborasaun planu urbanu nian no ba aprezentasaun paresér eskritu ida ne’ebé ko’alia kona-bá adekuasaun no konveniénsia hosi solusaun sira ne’ebé propoin ona iha planu.

Ikusliu, Konsellu Ministru asiste aprezentasaun hosi Ministru Finansas, Rui Augusto Gomes kona-bá kalendáriu preparasaun Orsamentu Jerál Estadu nian (OJE) ba tinan finanseiru 2023.

Tuir kalendáriu ne’ebé aprezenta ona, faze planeamentu nian sei hala’o iha fulan-marsu to’o loron 10 fulan-Maiu tinan 2022, bainhira hahú faze preparasaun nian.

Semináriu “Jornada Orsamentál sira” tenke hala’o to’o loron 30 fulan-juñu oinmai no Konsellu Ministru tenke halo apresiasaun ba projetu proposta Lei OJE tinan 2023 nian to’o loron 15 fulan-Setembru tinan 2022. Prevee katak OJE 2023 sei aprezenta ba Parlamentu Nasionál iha loron 1 fulan-outubru.

Advertisement

Jornalista: Vito Salvadór