Hatutan.com, (26 Fevereiru 2022), Díli- Atuál Prezidente Federasaun Futeból Timor Leste (FFTL) nudár mós Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, re-eleitu ba prezidente FFTL períodu 2022-2026.

Notísia iha Relasaun: Francisco Kalbuadi Retira Husi Nia Kandidatura ba Prezidente FFTL Fó Apoiu Ba Nilton Gusmão

Francisco Martins da Costa Pereira Jerónimo, re-eleitu ba prezidente FFTL períodu 2022-2026. Foto/Hatutan.com

Francisco Jeronimo re-eleitu ba kargu nudár prezidente ezekutivu FFTL ho votu 11 no nia adversariu Nilton Gusmão hetan votu 10 liuhusi votasaun iha segunda ronde Kongresu FFTL ba da-hitu iha Otél Novo Turismo, Dili, Sábadu (26/02/2022).

Hafoin komité eleitorál no komité jurídiku FFTL anúnsiu rezultadu ne’e, ekipa susesu husi Francisco Jerónimo espresa sira-nia sentimentu kontente, ksolok no balun haklalak ba vitória ne’ebé iha.

Hafoin rezultadu ne’e kongresista sira halo mós votu aklamasaun ba Tenente Jenerál Falur Rate Laek ba kargu vise-prezidente FFTL ho rezultadu votu afavór 20 no abstensaun ida (1). Entretantu Aleixo Cobra, ne’ebé mós kandidatu ba vise prezidente FFTL  deside retira husi nia kandidatura iha kongresu ne’e.

Iha kongresu FFTL ne’e eleitu mós Engracia Pimental Fernandes ba membru ezekutivu feto ho votu 13 hodi halakon kandidata seluk Teresinha Viegas ne’ebé hetan de’it votu neen (6) no votu nulu ida (1). Kona-bá kargu ka pozisaun sekretáriu jerál sei kompleta hafoin prezidente eleitu hili  tuir nia kompeténsia rasik.

Notísia iha Relasaun: Iha Abertura Kongresu FFTL, SEJD Hato’o Parabéns Ba Selesaun Nasionál U-23

Jornalista: Vito Salvador