Hatutan.com ( 01 Marsu 2022) Dili-Tribunal Distritál Dili (TDD) seidauk iha ajenda julgamentu ba kazu eis Komisáriu Funsaun Públiku (KFP) Liborio Pereira no kazu Ministru Obras Públiku (MOP) Salvador Eugenio Soares dos Reis Pires, maske prosesu tama ona iha TDD.

Notísia iha Relasaun: Kazu Libório ho Salvadór Pires, TDD Rezeita Pedidu Ministériu Públiku

Tribunál Distritál Dili (TDD). Foto/Espesiál

Tuir ofisial justisa iha TDD ne’ebé lakohi publika nia identidade katak, razaun kazu Liborio ho Salvador Pires ne’ebé ho nuc 0077/17.PGGCC seidauk halo julgamentu, tanba daudaun ne’e sei iha juiz prosesu atuál juis administradór Afonso Carmona nia liman.

Maske Parlamentu Nasional (PN) seidauk hasai imunidade husi arguidu Salvador Eugenio Soares dos Reis Pires, maibé despaixu juiz nian ne’e sita mós arguido Salvador Eugenio Soares dos Reis Pires nia naran.

Normálmente bainhira prosesu investigasaun remata maka TDD foin bele hatama pedidu ba Parlamentu Nasional hodi hasai Imunidade Salvador Eugenio Soares dos Reis Pires.

Antes ne’e, iha loron 7 fulan-Novembru  2021, TDD liu husi primeiru interrogatóriu aplika medida koasaun Proibisaun ba Auzénsia ka bandu Liborio Pereira labele sai ba rai-li’ur tanba deskonfia komete krime partisipasaun ekonómika no negósiu.

Jornalista: Carmelita Isaac