Hatutan.com, (02 Marsu 2022), Díli— Kandidatu Prezidente Repúblika períudu 2022 to’o 2027 Francisco Guterres Lú Olo ne’ebé ho nia númeru sorteiu 6,  perante apoiante sira iha Rejiaun Administrativa Espsiál Oecusse Ambeno (RAEOA), promete katak, bainhira eleitu nu’udár Prezidente Repúblika sei respeita prinsípiu separasaun poderes.

Kandidatu Prezidente Repúblika Francisco Guterres Lú Olo, hala’o abertura kampaña iha kampu Palaban, Pante Makasar, RAEOA. Foto/Ekipa Susesu Lú Olo.

“Prezidente Repúblika sei hatene deit atu respeita kona-bá prinsipiu separasaun de poderes. Hau respeita Parlamentu Nasionál hanesan órgaun ketak ida, Tanba hanesan órgaun ida ne’ebé mak halo Lei atu bele tesi ita hotu. Maibé Lei sira ne’e mós sei haruka ba Prezidente Repúblika atu halo promulgasaun ka veta,” Lú Olo hato’o kompromisu polítika ne’e durante abertura kampaña ne’ebé transmite direta via média sosiál pájina ofisiál apoiu kandidatu Lú Olo, iha kampu Palaban Pante Makasar, Kuarta (02/03/2022).

Notisia iha Relasaun:CNRT Lautém Kompromete Fó Votu 8,200 Ba Ramos Horta

Nia dehan, bainhira lei sira ne’ebé haruka ba Prezidente Repúblika maka la loos, Prezidente Repúblika sei veta no haruka fila fali atu bele hadi’a tanba Lei ne’e la serve ba povu ida ne’e.

Advertisement

Lú Olo konta tuir katak, iha ninia esperiénsia nia halo tiha ona buat ida ne’e, hanesan ezemplu katak Mari Bim Amude Alkatiri ne’ebé antes ne’e assume kargu hanesan Primeiru Ministru iha Setimu Governu ho nia dekretu Governu hamutuk hitu maka Lú Olo veta.

“Nia ema FRETILIN nian, maibé ninia Dekretu Lei balun ha’u veta hotu tanba sala. Agora daudaun Aniceto Guterres mós iha ninia lei balun mak ha’u veta no haruka fila fali atu hadi’a tanba sala,” nia subliña.

Tanba ne’e maka kandidatu ne’e husu ba Oecusse oan sira atu vota ba nia hodi hatuur loloos separasaun de poderes.

Iha fatin ne’e mós Lú Olo agradese ba apoiante sira ne’ebé sei fó votus iha loron 19 Marsu tinan ne’e, no husu atu akompaña nafatin kampaña tuir-mai  iha munisípuu sira seluk.

Kandidatu sira ba periudu 2022 to’o 2027 hamutuk na’in 16 mak hanesan:

Advertisement

1. Isabel da Costa Ferreira
2. Hermes da Rosa Correia Barros
3. Maria Ângela Freitas da Silva
4. Rogério Tiago Fátima Lobato
5. Anacleto Bento Ferreira
6. Francisco Guterres Lu Olo
7. Maria Helena Lopes de Jesus Pires
8. Tito da Costa Cristóvão (Lere Anan Timur)
9. Armanda Berta dos Santos
10. Antero Benedito da Silva
11. Constâncio da Conceção Pinto
12. Virgílio da Silav Guterres
13. Martinho Germano da Silva Gusmão
14. José Ramos Horta
15. Felisberto Araújo Duarte
16. Mariano Assanami Sabino Lopes

Jornalista: Carmelita Isaac