Hatutan.com, (07 Marsu 2022), Díli—Polísia Nasionál Timor-Leste (PNTL), liuhosi Servisu Investigasaun Kriminál Nasionál (SIKN), suspeita sidadaun ida ho inisial ETF ne’ebé sai hanesan autór prinsipál ba kazu sona kanek membru foun FALINTIL Forsa defeza Timor-Leste (F-FDTL), iha área Culuhun, Dili.

portavós Komandu Jerál PNTL, Superintendente Xefe Armando Monteiro. Foto/Hatutan.com.

Portavóz Komandu Jerál PNTL, Superintendente Xefe Polísia, Armando Monteiro haktuir kronolojia katak, iha Sábadu 05 Marsu 2022, maizumenus tuku 03:30 oras madrugada, mosu kazu ofensa integridade fízika agravadu ida iha áres Culuhun de Baixo, hodi rezulta sidadaun ida ho estatutu nu’udár membru foun ida iha instituisaun F-FDTL, hetan sona hosi grupu deskoñesidu.

Rezultadu hosi insidente ne’e, vítima hetan kanek ne’ebé grave iha isin-lolon, liu-liu kanek ida iha hirus matan, ida iha kabun parte liman sorin karuk no kanek rua iha liman-sorin loos.      

Hosi akontesimentu ne’e, Komandu Jerál PNTL, liuhosi Servisu Investigasaun Kriminál (SIKN), halo ona identifikasaun ba suspeitu na’in-lima, ne’ebé mak deskonfia envolve iha kazu ne’e.

Maibé, liuhosi prosesu sira identifkasaun nian ne’ebé SIKN halo, iha sidadaun mane ida ho inisiál ETF, mak sai hanesan autór prinsipál. Tanba ne’e maka, daudaun  ne’e kontinua hela prosesu investigasaun ba ETF.

“Hosi akontesimentu ida ne’e, ita hasa’e estatutu sidadaun ida ho inisiál ETF ho idade 37, ne’ebé hela mós iha área hanesan Culuhun de Baixo, sai autór prinisipál,” Portavóz Komandu Jerál PNTL, Superintendente Xefe Polísia, Armando Monteiro informa ba jornalista sira iha Kuartél Jerál PNTL, Caicoli, Segunda (07/03/2022).

Oras-ne’e Servisu Investigasaun Kriminál Nasionál, kontinua hala’o prosesu investigasaun ho objetivu atu bele dezenvolve no kolekta tán informasaun seluk tán, tanba bele deteta tán suspeitu sira seluk iha kazu ne’e.

“Motivu hosi akontesimentu ida ne’e, mosu dezintendimentu, bainhira espresa ida-idak ninia talenta, gostu no parte ida la simu. Entaun, hamosu agresaun ba malu no rezulta vitima sai kanek,” Komandante Armando Monteiro, esplika.

Vítima oras ne’e hala’o hela tratamentu ba saúde iha Hospitál Nacional Guido Valadáres (HNGV).

Jornalista: Rogério Pereira Cárceres