Hatutan.com (15 Marsu 2022), Díli—Asosiasaun HAK husu ba kandidatu Prezidente Repúblika na’in 16 atu hato’o  mensajen dame ba apoiante sira molok hakat ba eleisaun, nune’e preparadu hodi simu rezultadu eleisaun iha ámbitu dame no estabilidade.

Sisto dos Santos. Diretor Yayasan HAK.

KAK husu ne’e tanba, iha observasaun jerál durante kampaña nota katak kandidatu sira balun uza palku kampaña hodi insulta-malu, espresa deskontentamentu, sadere ba istória pasada hodi haluha programa kampaña.

Notisia iha Relasaun:Kampaña Ikus Ramos Horta iha Tasi Tolu, CNRT Husu Apoiante Sira Disiplina

“Tuir observasaun HAK jeralmente iha panorama politika liu-liu iha prosesu kampaña nia laran kandidatura uza palku hodi halo provokasaun liu-liu insulta malu ne’ebé hamosu reasaun entre militante no apoiantes, ikus liu rezulta ema lakon vida iha Baucau no insidente seluk iha Viqueque no kandidatu sira la hateten buat ida kona-bá asuntu ne’e,”Diretór Asosiasaun HAK, Sisto dos Santos hateten liu hosi konferénsia imprensa ne’ebé hala’o iha Asosiasaun HaK, Faról, Tersa (15/03/2022).

Tuir loloos uza oportunidade kampaña hodi konvense povu ho programa no planu bainhira eleitu ba PR, maibé realidade hatudu katak kandidatu sira lakon oportunidade ne’e hodi viola paktu unidade nasionál ne’ebé asina ona.

Ho insidente hotu ne’ebé akontese durante periudu kampaña, HAK konsidera kandidatu sira mak kuda ona ai-tarak iha komunidade nia leet, tanba hahú iha loron kampaña to’o ohin loron kandidatu sira kontinua insulta-malu.

Tanba ne’e, HAK la garante katak rezultadu eleisaun apoiantes no militante sei simu ho dame ka la’e.

Antes ne’e molok hahú kampaña eleisaun nian, CNE organiza Kandidatu sira hodi asina paktu nasionál perante lia na’in sira kandidatu sira jura atu la insulta malu durante kampaña.

Jornalista: Carmelita Isaac