Hatutan.com, (20 Marsu 2022), Dili-Governu Timor Leste iha kompromisu  atu suporta autór negósiu nasaun nian iha tempu difisil kauza husi pandemia Covid-19 no situasaun atuál sósiu-ekonomia.

Vise-Ministru MTCI, Domingos Lopes Antunes. Foto/Espesiál

Governu hakarak atu asegura sustentavel negósiu, loke oportunidade negósiu no kria kampu traballu foun, disponibilidade apoiu emprendorismu, no reforsa tezouraria liquidez.

Mikro, Pequena no Media Emprezas (MPME) nudár autór importante ne’ebé presiza asisténsia espesiál liu husi asesu finanseiru.  Tamba ne’e, Ministériu Turizmu, Komérsiu no Indústria (MTCI, sigla Portugés) liu husi suporta husi Programa Nasoins Unidas ba Dezenvolvimentu (PNUD) inisia ona eskema kréditu funan ki’ik hanaran “Fasilidade Garantia Kréditu Suave” hodi suporta autór negósiu sira liu-liu ba MPME sira iha Timor-Leste.

Liu husi komunikadu imprensa ne’ebé Hatutan.com asesu, Domingu (20/03/2022), relata katak esforsu konjuntu entre autoridade finanseiru iha inisiativa foun ba Kréditu Suave demonstra ho susesu liu husi emisaun DECRETO-LEI N.º 8 / 2022, 16  Fevereiru ba  “FASILIDADE GARANTIA CRÉDITO SUAVE”.

Prosesu kooperasaun hodi suporta MPME entre MTCI no PNUD inisia iha tinan 2015 liu husi estabelese fundu Negósiu Sosiál hodi suporta ba empreza negósiu sosiál sira.  Maibé tamba situasaun polítika, implementasaun programa entre MTCI no UNDP foin hahú hikas iha 2020 liu husi asina MoU entre parte rua.

Estabelese DECRETO-LEI N.º 8 / 2022, 16 Fevereiru ba  “FASILIDADE GARANTIA CRÉDITO SUAVE” nudár inovasaun nasaun nian hodi suporta finanseiru ba MPME sira. Dekretu Lei ne’e konsege aprova iha Konsellu Ministru  iha 14 fulan-Novembru 2021, promulga husi Prezidente  Repúblika iha loron 11 fulan-Fevereiru 2022, no Publika iha Journal Repúblika, 16 fulan-Fevereiru 2022.

Implementasaun “Fasilidade Garantia Kréditu Suave” ida-ne’e, MTCI servisu hamutuk ho parseiru inisiadór PNUD, Banco Nacional de Comercio Timor-Leste (BNCTL) no Instituto de Apoio e Dezenvolvemento Emprezarial (IADE) estabelese ona prosedimentu no regra interna hodi bele operationalize programa no atividade ne’e ho susesu no transparente.

Iha momentu ida ne’e MTCI, PNUD, no parseiru implementadór sira foti oportunidade hodi enkoraja MPME no autór negósiu sira hotu atu partisipa másimu iha asesu ba kapitál liu husi Kréditu Funan ki’ik hodi finansia negósiu no mós rekupera husi krize pandemia Covid-19 no sósiu-ekonomia atuál.

Jornalista: Vito Salvadór