Hatutan.com (13 Abríl 2022) Díli—Asosiasaun HAK liu hosi karta aberta ne’ebé haruka ona ba Parlamentu Nasionál (PN), Ministériu Interiór (MI), Comissão Nacional das Eleições (CNE) no Sekretariadu Tékniku Administrasaun Eleitorál (STAE), rekomenda alternativa balun ba melloramentu taxa partisipasaun eleitór iha votasaun ne’ebé sei realiza iha 19 Abríl, liu-liu halo revizaun ba oráriu vota, liu hosi fó fleksibilidade iha sentru votasaun paralelu inklui aumenta perdiem ba membru Polisia Nasionál Timor Leste (PNTL).

Pedidu ida ne’e bazeia ba esperiénsia votasaun primeira volta ne’ebé hatudu katak, iha sentru votasaun eskola São Pedro Comoro eleitór barak mak ba iha tuku 15:00 maibé labele tama hodi vota tanba konsidera oras liu ona, tanba ne’e sira lakon diretu votu.

Notisia iha Relasaun:Durante Kampaña Eleisaun Prezidensiál, Deputadu Barak Auzénsia iha Plenária PN

Advertisement

“Iha loron 19 Marsu povu tomak ezerse ona sira nia direitu ba vota, maibé faktu iha terrenu hatudu ema barak la konsege ezerse sira nia direitu, tanba oras la sufisiente hahú iha tuku 7:00 no remata iha tuku 15:00. Estudante barak la vota iha sentru votasaun paralelu, pasiente balun la konsege vota, dadur balun la vota inklui perdiem ba membru PNTL tenke hasa’e ba $25-35. Tanba ne’e liu hosi karta aberta ne’ebé ami haruka ona ba iha loron 12 fulan ne’e, husu atu CNE no STAE review fali oras votasaun hahú iha tuku 7:00 dader no remata iha tuku 16:30. Nune’e mós fó fleksibilidade iha sentru votasaun paralelu nune’e bele asegura labele lakon direitu votu maski eleitorál munisípiu nian,” Diretór HAK Sisto dos Santos hateten liu hosi konferénsia imprensa ne’ebé hala’o iha edifisiu Faról, Kinta (13/04/2022).

Alende ne’e husu ba PN atu hasai rezolusaun ida, nune’e bele fó biban ba CNE no STAE hodi halo mudansa ba ambiente votasaun ne’ebé sei realiza iha loron 19 fulan ne’e, nune’e ema hotu-hotu labele lakon sira nia direitu.

Husu ba CNE atu bele imprime bulletin no hadi’a sentru votasaun ne’ebé merese ba ema ho defisiente matan nune’e bele ezerse sira nia direitu ho di’ak.

Kona-bá ne’e, parte CNE rekoñese simu ona karta ka rekomendasaun hosi parte HAK, maibé CNE labele halo buat ida tanba ne’e bazeia ba lei eleitorál ne’ebé iha.

Vise Prezidente CNE, Domingos Barreto  hateten lei hateten kalaru katak vota hahú tuku 7:00 dader no remata iha tuku 15:00 lorokraik, maibé bainhira tuku 15:00 maka ema sei iha formatura, entaun sei kontinua maibé hirak ne’ebé foin mai labele ona.

Advertisement

Hatán ba rekomendasaun kona-bá fleksibilidade iha sentru votasaun paralelu sei kontinua hanesan iha primeira volta  katak, ema ne’ebé naran rejistadu iha sentru votasaun paralelu mak bele vota.

“Sira ne’ebé la rejistadu iha sentru votasaun paralelu, Estadu prepara ona karreta hamutuk 100 hodi transfere eleitór hosi Munisipiu Dili ba idak-idak nia Munisipiu, hodi bele vota no sei arranka iha loron 18 fulan ne’e,” Domingos Barreto hateten.

Eleisaun Prezidensiál segunda volta sei realiza iha loron 19 fulan Abríl tinan 2022.

Jornalista: Carmelita Isaac

Advertisement