Hatutan.com, (14 Abríl 2022), Díli– Deklarasaun Kandidatu Prezidente Repúblika ho númeru sortie ida (1), José Manuel Ramos-Horta iha debate públiku kandidatu PR sira nian, Kuarta kalan (13/04/2022), iha Salaun OKA, Dili, hasai lia-fuan balun ne’ebé ladún korresponde ho integridade Universidade Nasionál Timor Lorosa’e  (UNTL) nian.

Konferensia imprensa Magnifiku Reitór UNTL, João Soares Martins ho nia estrutura, 14 Abríl 2022. Foto/Média UNTL

Iha debate kandidatu PR períodu 2022-2027 ne’ebé modera husi Pe. Bento Barros Pereira, kandidatu José Manuel Ramos-Horta, ho síniku ka soe-lia hasoru kandidatu PR ho númeru sorteiu rua (2), Francisco Guterres “Lú Olo” katak, nia ba Palásiu Aitarak Laran sei la lori estudante lisensiadu direitu husi UNTL tanba la hatene interpreta Konstituisaun Repúblika Demokrátika Timor-Leste (K-RDTL) ho di’ak no loloos. Nune’e, hamosu krize polítika no krize institusionál ne’ebé naruk to’o ohin loron.   

Afirmasaun Ramos-Horta nian ne’e halo reitoria UNTL sira la kontente no liuhusi konferénsia imprensa, Kinta meiudia (14/04/2022), deklara hodi husu atu kandidatu Prezidente Repúblika 2022, respeita no valoriza UNTL hanesan universidade estatál ne’ebé sai fatin atu forma futuru lideransa ba nasaun Timor-Leste.

Magnétiku Reitór UNTL, João Soares Martins, hamutuk ho nia estrutura sira UNTL, hateten,  respeita nia profesor ida-ida, nia funsionáriu administrativu ida-ida, nia estudante ida-ida nia sentidu  votu no lakohi atu influensia ema ida atu vota ba kandidatu  ne’ebé de’it. UNTL hakarak de’it atu defende nia-an no sosiedade tomak nia oin.

“UNTL haksolok tebe-tebes tamba nia naran temi iha debate prezidensiál 2022, maibé UNTL lamenta tebe-tebes ho liafuan ne’ebé kandidatu Prezidente Repúblika, DR. José Ramos-Horta hasai iha debate prezidensiál hodi hatún imajen UNTL nian, hodi minimiza nia kualidade. Dala hira kedas kandidatu Prezidente Repúblika DR. José Ramos-Horta hasai liafuan ne’ebé atu dezakredita UNTL nia imajen husi de’it nia impresaun rasik,” Magnétiku Reitór UNTL, João Soares Martins  iha konferénsia imprensa ne’e.

UNTL estabelesidu husi tinan 2000, nudár instituisaun Estadu nian. Nia sujeita ba avaliasaun fila-fila husi instituisaun akreditasaun no avaliasaun independente ANAAA, membru juri sira kompostu husi avaliador nasional no internasional ne’ebé hetan predikadu avaliasaun A. Ida-ne’e rekoñese dunik katak UNTL kontribui ona durante tinan 20-resin ba formasaun rekursu-umanus ne’ebé kontribui ba funsionamentu  estadu no nasaun Timor-Leste no mós prepara rekursu umanu ba jerasaun foun sira tuir mai, nafatin ba nafatin.

“UNTL apela atu kandidatu ne’ebé povu hili sai prezidente repúblika atu bele apoiu nafatin UNTL, atu instituisaun ne’e halo nia knaar di’ak liután ba rai Timor-Leste nia futuru,” Reitór UNTL afirma tan.

Molok ne’e, kandidatu Prezidente Repúblika José Manuel Ramos-Horta, haloos ona nia deklarasaun hodi hateten lia-fuan ne’ebé nia soe ba Lú Olo hodi temi UNTL tamba Lú Olo halo kursu iha UNTL no depois nia interpretasaun ba konstituisaun sala..

Ramos-Horta hateten, se ida ne’e mak sai viral fali ne’e hatudu kualidade mídia sosial no buat ida  halimar ne’e no la’ós importante liu iha debate oras tolu.

“UNTL universidade boot, profesór boot mós barak, alunu di’ak barak mak sai husi UNTL. Tanba ne’e, iha debate ne’e hanesan halimar de’it ho Lú Olo, ha’u haree nia hamnasa no la sente ofendidu,” José Ramos-Horta esklarese hikas.

Jornalista: Vito Salvador