Hatutan.com, (09 Marsu 2023), Díli-Asosisaun Akadémika Estudantil (AAE) Universidade Nasionál Timor-Lorosa’e (UNTL) fó ultimatu bá reitoria UNTL no ezije Banku  Nasionál Komérsiu Timor-Leste (BCNTL, sigla portugés) atu hadi’a mekanizmu atendimentu inskrisaun bá estudante sira iha UNTL.

Lee Mós : Estudante Foun Konsidera Prosesu Inskrisaun iha UNTL “Sabraut”

Bainhira kontínua ho mekanizmu atendimentu “sabraut” hodi prejudika estudante sira sena-malu, dudu-malu no forma iha liña naruk hanesan daudaun ne’e akontese, maka Estudante sira ne’ebé halibur iha Asosiasaun Akadémiku Estudantíl (AAE) UNTL sei halo asaun no blokeia atividade orientasaun akadémika dahuluk bá estudante foun sira tinan akadémiku 2023.

Asosisaun Akadémika Estudantil (AAE) Universidade Nasionál Timor-Lorosa’e (UNTL) fó ultimatu bá reitoria UNTL no ezije Banku  Nasionál Komérsiu Timor-Leste hadi’a mekanizmu atendimentu inskrisaun bá estudante sira iha UNTL. Foto/Elio dos Santos da Costa

Liuhosi konferénsia imprénsa iha resintu UNTL Sentral, Caicoli, Díli, Kinta (9/3/2023),  estrutura Asosiasaun Akadémika Estudantil  (AAE) UNTL  hato’o sira-nia lamentasaun bá atendimentu inskrisaun ne’ebé la konfortavel no la dignu. Nune’e, obriga estudante sira tenke hadau-malu fatin, sena-malu no balun tenke mai forma dadeer de’it to’o balun obrigadu tenke toba iha resintu UNTL nian atu bele hadau fatin forma bá halo inskrisaun.

Portavós AAE, Julião Ximenes Castelhano dehan, situasaun ne’ebé mak oras ne’e la’o iha BNCTL nia sukursál  iha Kampus Sentrál UNTL dezde loron dahuluk inskrisaun, Segunda to’o Kuarta (06-8/3/2023),  prejudika tebes estudante sira.

Avizu ne’ebé UNTL hasai oras inskrisaun hahú tuku 8.00 dadeer Otl, maibé BCNTL Sukursál iha UNTL loke atendimentu inskrisaun iha fali tuku 9.30 Otl no dala ruma loke tuku 10.00 Otl.  Nune’e, to’o tuku 12:00 Otl, pauza tanba tenke han meiudia no loke fali tuku 14:00 Otl no iha ida nia laran de’it halo atendimentu  no tenke taka iha tuku 15:00 Otl.

Ho númeru estudante foun ne’ebé hala’o inskrisaun liu ema-400, seidauk sura ho estudante tuan sira no prazu  ne’ebé UNTL fó katak hotu-hotu tenke hala’o inskrisaun iha semana ida nia laran.

“Ho situasaun ka problema sira dudu-malu, sena-malu ne’e, ikus mai rezulta estudante balu dezmaia, balu tanis, balu osan lakon, balu resibu bá pagamentu lakon to’o estudante barak mak la konsege halo pagamentu. Inklui estudante foun ida hosi Liquiça  enfrenta asidente tráfiku tanba de’it tenke hala’o viajen hosi Liquiça mai Dili atu halo inskrisaun.  Atendimentu ida sabraut ne’e halo ami Asosiasaun Akadémika Estudantil UNTL preukupa no lamenta tebes ho atendimentu iha BNCTL-UNTL Sentrál nian,” Julião Ximenes Castelhano afirma.

AAE mós konsidera estrutura UNTL la preparadu hodi simu estudante foun tinan adakémika no la kria mekanizmu di’ak, hodi atende estudante sira, no mós la halo jestaun di’ak, inklui laiha seriedade atu rezolve problema hirak ne’e, tanba problema ida ne’e, la’os foin akontese agora, maibé sempre akontese kada tinan.

Tuir AAE nia haree katak  prosesu inskrisaun “sabraut” tanba estrutura UNTL ansi liu atu realiza orientasaun akadémika, maske la preparadu no mós estrutura UNTL liuhosi parte finansas no akadémika obriga estudante foun ho númeru totál 4000-resin tenke selu hotu kedan iha semana ida nia laran, bazeia bá avizu ne’ebé fó sai iha loron  02 fulan-Marsu 2023.

Tuir AAE katak durasaun tempu inskrisaun semana ida de’it la sufisiente bá estudante foun sira hosi fakuldade hothotu atu halo pagamentu tuir data ne’ebé mak UNTL determina.

“Sé Magnifku reitór UNTL ho ninia estrutura la buka solusaun lalais bá problema sira ne’ebé temi ona, no la halo alterasaun bá data orientasaun, ami sei halo asaun hasoru estrutura UNTL no blokeia loron dahuluk orientasaun akademika nian,” Portavós AAE, Julião Ximenes Castelhano afirma.

Asosiasaun Akadémika Estudantil UNTL ezije bá Reitór UNTL, João Soares Martins ho nia esturutura, atu buka lalais solusaun bá problema hirak ne’e, tanba estudante barak mak sai ona vitima bá sistema atendimentu iha sukursal BNCTL iha kampus sentrál UNTL ne’ebé “sabraut”.

Univesitáriu sira ne’e ezíje bá Magnifiku Reitór UNTL no estrutura atu koordena ho ezekutivu sira iha BNCTL atu buka mekanizmu ida di’ak liuhosi aumenta funsionáriu BNCTL nian, nune’e bele halo atendimentu ne’ebé laís bá estudante sira.

AAE  husu bá parte finansas UNTL nian, atu altera data bá orientasaun akadémika no orienta parte akadémika hodi prolonga tán data pagamentu, atu nune’e, estudante sira bele iha tempu sufisiente hodi halo pagamentu iha BNCTL, no mós hodi fó tempu bá komisaun organizadóra kada fakuldade hodi halo preparasaun di’ak liután hodi simu estudante foun sira.

Estrutura UNTL Okupadu

Hatutan.com tenta ona halo konfirmasaun ho Vise Reitór UNTL bá Assuntus Akademiku no Garantia Kualidade, Samuel Venâncio de Sousa Freitas, hodi halo konfirmasaun kona-bá estudante sira ne’e ninia lamentasaun, maibé okupadu ho enkontru iha fatin seluk.

Biar nune’e, Hatutan.com kontinua halo esforsu bá to’o iha Sekretariadu Vise Reitor bá Assuntus Administrasaun,  Finansa no Administradór Jerál UNTL,  maibé rajeita fó komentáriu, no fó mós razaun katak, durante ohin loron tomak,  laiha tempu livre atu atende entrevista  ho jornalista sira.

Jornalista: Rogério Pereira Cárceres