Hatutan.com, (10 Marsu 2023), Díli—Estudante sira hosi Universidade Nasionál Timor Lorosa’e (UNTL) apresia no hato’o obrigadu barak bá reitoria UNTL ho Banku Nasionál Komérsiu Timor-Leste  (BNCTL, sigla portugés) ne’ebé hadi’a hikas mekanizmu instrusaun bá estudante sira tinan akadémiku 2023 nune’e evita estudante sira sena-malu, dudu-malu no forma dadeer nakukun de’it.

Lee Mós : Atendimentu Inskrisaun “Sabraut”, Estudante Sira Fó Ultimatu bá Reitoria UNTL no Ezije BNCTL Hadi’a Mekanizmu

Estudante sira UNTL nian la sena-malu ka la hadau-malu ona halo inskrisaun iha BNCTL Sukursál UNTL, Caicoli, Díli, Sesta (10/3/2023). Foto/Vito Salvadór

“Ami kontente no apresia tebes ho mudansa inskrisaun ne’e.  hanesan ita hatene dezde hahú prosesu inskrisaun iha Segunda-Kuarta (6-8/3/2023), estudante sira sena-malu no balun mai dadeer tuku 5.00 de’it hodi hadau malu fatin atu halo inskrisaun. Akontese sena-malu to’o estudante balun dezmaia. Mas hahú Kinta meiudia to’o Sesta  (09-10/2023),   UNTL ho BNCTL halo mudansa bá mekanizmu inskrisaun no fasilita tebes Estudante sira halo inskrisaun la sena malu ona,” Estudante UNTL ida ne’ebé husu atu la bele publika nia identidade hateten bá Hatutan.com   iha resintu UNTL Sentral, Caicoli, Díli, iha Sesta dadeer (10/3/2023).

Iha loron hirak liubá, fontes ne’e fó sasin katak BNCTL halo atendimentu inskrisaun hahú tuku 9.30 Otl, maibé ohin komesa halo atendimentu iha tuku 08.00 dadeer Otl.  Mudansa ida-ne’e ajuda tebes estudante sira atu halo inskrisaun.

Iha loron hirak liubá, Segunda to’o Kuarta, estudante hotu-hotu ne’ebé halo inskrisaun sena-malu, dudu-malu to’o balun monu dezmaia no balun la konsege hetan oportunidade atu halo inskrisaun, maibé hosi Kinta meiudia, BNCTL ho UNTL fasilita loke tan fatin inskrisaun tolu iha resintu UNTL no UNTL ho BNCTL mós fó sai avizu bá estudante sira atu  bele halo inskrisaun iha fatin sira ne’ebé estabelese.  

Iha Dili, estudante sira bele ona halo inskrisaun iha BNCTL Sukursál Caicoli  iha Kampaun Obrigadu Barack, bele mós halo inskrisaun iha BNCTL Sentral Mandarin, bele mós halo inskrisaun iha BNCTL Sukursál Becora no bele mós halo inskrisaun iha BNCTL Sukursál Timor Plaza.

Senadu Jerál UNTL  ne’ebé Hatutan.com konfirma no husu atu la bele publika nia identidade mós hateten, agora prosesu inskrisaun estudante sira la’o kapás loos no  fasilita tebes estudante sira halo inskrisaun ho hakmatek.

Estudante sira UNTL nian la sena-malu ka la hadau-malu ona halo inskrisaun iha BNCTL Sukursál UNTL, Caicoli, Díli, Sesta (10/3/2023). Foto/Vito Salvadór

“Loos duni iha loron hirak liubá prosesu inskrisaun kuaze atu hamosu problema iha resintu UNTL Sentral tanba estudante sira sena-malu no balun hakilar malu ho seguransa sira, inklui hakilar too reitoria sira. Horiseik mós  Asosiasaun Akadémiku Estudantíl (AAE) UNTL halo protestu liuhosi konferénsia imprensa no momentu ne’e kedas reitoria ho BNCTL buka hadi’a mekanizmu atendimentu inskrisaun no ohin prosesu inskrisaun la’o hakmatek no kapás,” Senadu Jerál  UNTL hateten.

Universidade Nasionál Timor Lorosa’e (UNTL), Diresaun Jerál Servisu Administrasaun Akadémika liuhusi Diresaun Nasional Atendimentu Estudante (DNAE) fó  atendimentu ba estudante foun tinan akadémiku 2023, ne’ebé admitidu ona iha UNTL hahú halo inskrisaun iha loron Segunda-Segunda (06-13/3/2023).

Lee Mós : Estudante Foun Konsidera Prosesu Inskrisaun iha UNTL “Sabraut”

Jornalista : Vito Salvador