Hatutan.com, (14 Marsu 2023), Díli-Estudante Universidade Nasional Timor-Lorosa’e (UNTL), liuhosi Asosiasaun Akadémika Estudantíl (AAE) konsidera katak, asaun pasifika ne’ebé sira hala’o iha Segunda (13/03/2023), hasoru Reitór João Soares Martins no nia estrutura hanesan parte ida atu kontribui bá mudansa iha UNTL.

Lee Mós : Selesaun Estudante Foun Atrazu Prejudika Prosesu Aprendizajen UNTL

Asosiasaun Akadémika Estudantíl (AAE) halo konférensia imprensa iha Kampus Sentral UNTL, Tersa (14/3/2/2023). Foto/Rógerio Pereira Cárceres

Asaun ne’ebé estudante sira ne’e hala’o tanba sistema ka mekanizmu  atendimentu  inskrisaun bá estudante foun sira iha administrasaun jerál Kampus Sentrál UNTL nian la’o “sabraut” no parte estrutura UNTL rasik seidauk rezolve.

Tuir oráriu, Segunda (13/03/2023), UNTL hahú abertura jerál bá atividade orientasaun akadémika iha fakuldade sira hotu. Maibé, tanba mosu asaun protesta hosi estudante hirak ne’e, maka ikus mai blokeiu totál atividade akadémika ne’e iha Kampus sentrál.

Vise Reitór Asuntu Akadémiku bá Garantia Kualidade no atuál Komisaun Organizadora Orientasaun Akadémika 2023, Samuel Venâncio Freitas, ofisiálmente hasai karta avizu ida, ho númeru 04/UNTL/COOA.23/III/2023, hodi kansela totál atividade orientasaun akadémika bá estudante foun sira hamutuk 3,000-resin.  

“Universidade Nasionál Timor-Lorosa’e, informa bá estudante foun asesu bá UNTL, tinan Akadémika 2023, katak, orientasaun akadémika sei laiha, no prosesu ensinu no aprendizajen sei hahú diretamente bá tinan akadémika 2023 nian iha fakuldade ida-idak,” Hatutan.com, sita iha karta avizu ne’ebé publika iha konta Facebook UNTL, Tersa (14/03/2023).

Portavós AAE, Nuno Kaymodo, lori estrutura Asosiasaun Akadémiku Estudantíl UNTL nian esklarese no klarifika bá públiku, liu-liu bá inan-aman no estudante foun sira katak, ligadu ho asaun Pasífiku, horiseik, tanba konsidera estrutura UNTL prinsipalmente Magnifiku Reitór ho ninia estrutura la preparadu hodi realiza orientasaun akadémika UNTL.

Asosiasaun Akadémika Estudantíl (AAE) halo konférensia impransa. Foto/Rógerio Pereira Cárceres

La’ós ne’e de’it, estudante sira ne’e, nota katak, estrutura UNTL halo diskriminasaun bá estudante foun tinan akadémiku 2023, tanba estudante balu ne’ebé selu ona, bele tuir orientasaun akadémiku, no balu seidauk, sei kontinua forma hodi halo pagamentu no inskrisaun.

“Senadu sira blokeiu totalmente orientasaun akadémiku, tanba hakarak estudante sira selu hotu mak tuir orientasaun dala-ida, hodi nune’e, bele iha tratamentu hanesan, iguál no justu,” Pprtavós AAE, Nuno Kaymodo, fó razaun.

Asosiasaun Senadu sira hakarak estrutura UNTL tenke buka mekanizmu hodi hadi’a sistema atendimentu bá estudante, liu-liu iha pagamentu no administrasaun akadémika, hodi nune’e bele rezolve problema estudante sira nian dudu-malu,  sena-malu, no hamriik tán iha loro-manas hodi foti dokumentu.

Tuir sira katak, Ppoblema sira ne’e akontese, tanba estrutura UNTL laiha seriedade, no laiha vontade di’ak, hodi rezolve, tanba tinan-tinan, sempre akontese ida ne’e.

“Ho ida ne’e, senadu estudantíl, hamutuk ho estudante UNTL, prinsipalmente, estudante foun sira, hakarak deklara bá públiku katak, asaun ne’ebé akontese horiseik iha kampus UNTL Sentrál, ne’e nu’udár aktu ida ne’ebé kontribui bá mudansa no aktu motiva estrutura UNTL, hodi bele halo reflesaun, hodi buka mekanizmu, hodi melloria serbisu atendimentu estudantíl nian, liu-liu iha pagamentu no administrasaun akadémiku, no tau másimu atensaun bá preokupasaun no problema estudante sira nian,” Portavós AAE, Nuno Kaymodo, hateten.

Asosiasaun Senadu UNTL informa bá inan-aman no estudante foun sira katak, senadu sira sei tuur hamutuk, hodi ko’alia ho estrutura UNTL, ligadu ho avizu ne’ebé fó sai hosi prezidente komisaun organizadora bá orientasaun akadémiku, Samuel Venâncio Freitas, atuál Vise Reitór Asuntu Akadémiku UNTL, hodi husu klarifikasaun bá avizu refere, iha ne’ebé, temi katak, tinan ne’e, laiha orientasaun akadémiku, tanba UNTL kansela ona.

Senadu sira sei haruka karta bá prezidente konsellu jerál UNTL, hodi konvoka reuniaun estraordinária ida, hodi bele ko’alia kona-bá problema estudante nian. Sei hato’o problema estudante sira nian, bá iha Parlamentu Nasionál no mós ministériu ensinu superiór hodi bele husu bá reitór hodi rezolve.

Informa bá inan-aman no estudante foun sira katak, estudante ne’ebé admitidu ona hodi asesu bá UNTL, bele kontinua selu ka bele hasoru senadu sira, atu nune’e bele buka dalan, hodi koordena ho estrutura UNTL, hodi rezolve sira-nia problema.

Ikus liu, husu bá kolega estudante foun sira, kontinua bá iha ida-idak sira-nia fakuldade, hodi koñese di’ak liután, ambiente fakuldade no estrutura fakuldade nian.

Labele Ameasa

Iha biban ne’e, Julião Ximenes Castelhano, hanesan mós membru ida iha asosiasaun senadu jerál UNTL nian, husu bá estrutura UNTL no fakuldade, labele ameasa senadu sira, no estudante foun sira ne’ebé maka horiseik halo asaun pasifika hasoru despaxu reitór nian, ne’ebé ko’alia kona-bá orientasaun akadémika ne’ebé maka monu iha horiseik.

“Ami nafatin husu bá estrutura, labele ameasa estudante sira, no senadu sira. Sé ami hatene, ami sei prosesa tuir lei. No ami sei mobiliza estudante hothotu, sei tun halo manifestasaun hasoru reitór. Ne’e mak ami nia alternativa,” Julião Ximenes Castelhano afirma.

Universitáriu sira ne’e, komprometidu sei husu no hasoru Vise Reitór Asuntu Akadémika, hodi halo klarifikasaun bá avizu ne’ebé mak horiseik nia fó sai, kona-bá kanselamentu orientasaun akadémika 2023. Tanba karta ne’e, laiha razaun ida ne’ebé maka aprofunda para nia atu halo kanselamentu bá orientasaun akadémika ne’e.

Senadu Jerál UNTL, Cristóvão de Araujo Mauto. Foto/Rógerio Pereira Cárceres

Senadu Jerál UNTL, Cristóvão de Araujo Mauto hatutan, sei buka tuir estrutura UNTL no fakuldade ida ne’ebé mak tenta ameasa membru senadu sira inklui estudante foun sira. Sé ida ne’e akontese, sira sei levanta ida ne’e sai kazu boot hodi prosesa tuir lei ne’ebé mak vigora iha Timor-Leste.

Kona-bá UNTL halo kanselamentu bá orientasaun akadémika bá tinan 2023 ne’e, tuir Senadu Jerál ne’e katak, laiha nesesidade atu bele realiza fali iha tinan oin. Ho ida ne’e, sira sei konfirma tiha ho parte relevante, depois mak foin deklara fali sira-nia pozisaun bá públiku, katak, orientasaun atu hahú tinan ida ne’e ka tinan oin.

Cristóvão afirma, sira-nia asaun ne’ebé hali iha horiseik, la’ós destroi, maibé, asaun ida ne’ebé atu motiva estrutura UNTL, bele halo reflesaun ida, para oin-nusa, buka mekanizmu, buka meius, para atu bele rezolve problema estudante nian,”

Jornalista: Rogério Pereira Cárceres