Hatutan.com, (18 Abríl 2022), Díli- Igreja Katólika Timor-Leste liu husi Konferénsia Episkopál Timorense (CET, sigla portugés), Komisaun Nasionál Justisa, Pás no Integridade Kriasaun (JPIC, sigla portugés) husu sarani no sidadaun sira atu labele falta ba vota no vota ho konsiénsia hodi hili Xefe Estadu atu ukun povu no nasaun Timor-Leste.

Igreja Katólika Timor-Leste liu husi Konferénsia Episkopál Timorense (CET), Komisaun Nasionál Justisa, Pás no Integridade Kriasaun (JPIC) husu sarani no sidadaun sira atu labele falta ba vota no vota ho konsiénsia iha loron 19 Abríl 2022. Foto/Hatutan.com

Diretór Programa Edukasaun no Sidadania JPIC, Pe. Domingos Soares “Maubere” iha konferénsia ba imprensa ne’ebé halo iha sede JPIC, Balide,  Díli, Segunda (18/04/2022), hateten, Programa Edukasaun ba Sidadania, Comissão Nacional Justisa, Pás, Integridade Kriasaun nian, hakarak hato’o ba sarani no sidadaun laran luak sira iha Timor laran tomak katak nu’udár ema moris hakarak moris iha hakmatek nian laran, tuir Maromak nia hakarak no ba ne’e mak Nia hakiak ema, no tuir dalan ne’ebé Nia hatudu.

Nia afirma, sees an tiha hosi dalan ne’e, Maromak haruka nia Oan mai, hodi hatudu dalan foun-dalan Domin nian, ba ema hosi Nia Oan Mane, Jesus Kristu, ne’ebé hanorin hela nia-ema sira hosi Igreja.

“lgreja mai hanorin ita atu envolve an iha polítika hodi hala’o hamutuk moris nasaun nian, iha aspetu hotu-hotu, inklui iha hili governante sira. Hotu-hotu iha direitu no devér atu kontribui ho nia votu livre atu promove bem komum, ema hotu-hotu nia di’ak,”  Pe. Domingos “Maubere” haktuir.

Sidadaun hotu-hotu tenke hadomi Nasaun ne’e hanesan grasa boot husi leten, maibé manan mós hosi asuwa’in rihun nia raan fakar no ruin naklekar iha Timor laran tomak, ne’ebé sidadaun hotu tenke tane nafatin. Sarani no sidadaun hotu sei nafatin tane nia erói sira, bainhira sidadaun ida kontribui ba Nasaun ninia prosperidade, hosi nia partisipasaun ativa iha polítika, hanesan ba vota iha eleisaun sira, tuir Konstituisaun Art. 47 ho Art. 65 hatudu dalan. No órgaun eleitór sira sei hatudu servisu profesional hodi garante sidadaun sira nia direitu ba vota.

“Ita hein atu CNE ho STAE hala’o sira-nia knaar ho kompeténsia, transparénsia no imparsialidade atu hotu-hotu bele partisipa iha eleisaun, nu’udár festa demokrasia nian.”

Pe. Domingos “Maubere”  subliña iha biban ida-ne’e igreja liu husi saseluk Kristu nian, bispu no kleru igreja partikular CET nian husu atu aban loron 19 fulan-Abríl, sarani no sidadaun sira labele falta ba vota no vota ho konsiénsia nu’udár direitu no obrigasaun moral, iha Maromak, Nasaun no Matebian sira nia oin.

Jornalista: Vito Salvador