Hatutan.com (19 Abríl 2022), Díli-Komandante Jerál Polísia Nasional Timor-Leste (PNTL), Komisáriu Faustino da Costa, konfirma katak, ema sivíl ho armadu (kilat-boot) hodi halo eskolta Konselleiru másimu Partidu Kmanek Haburas Unidade Nasional Timoroan (KHUNTO), José dos Santos “Naimori Bucar”  hanesan membru PNTL ida husi Unidade Espesiál Polísia (UEP).

Lee Mós: FM Hein Klarifikasaun Komandu PNTL Kona-bá Sivíl Armadu Fó Seguransa Bá Naimori

Ema sivíl ho kilat ne’ebé fó seguransa ba Konselleiru Másimu Partidu KHUNTO, José dos Santos “Naimori Bucar”. Foto/screenshot husi video ne’ebé viral iha Facebook

“Atu dehan, iha ne’ebá, loos duni, ne’e membru PNTL, nia eskolta ba José dos Santos “Naimori Bucar”. Agora, liga bá dehan ema na’in hira,  dezde Segunda (18/04/2022), ami halo ona xamada, ami notifika ona ema balu, lubuk ida mak ema intelektuál,” Komandante Jerál PNTL, Komisáriu Faustino da Costa hatán ba Hatutan.com, hafoin ezerse nia direitu votu, iha sentru votasaun CBF Farol, Suku Motael, Postu Administrativu Nai’n-Feto, Munisípiu Dili, Tersa (19/04/2022).

Maske la temi klaru identidade hosi membru ne’e, maibé Komandu PNTL fó ona orientasaun bá superiór sira iha UEP hodi halo xamada. Alende ne’e, koloka ona ekipa hodi halo mós identifikasaun ba sidadaun sira ne’ebé deskonfia utiliza arma (kilat) ho ilegál.

Kona-bá regra atu regula membru UEP sira ne’ebé halo eskolta ka fó seguransa ba ema, komandu PNTL iha ninia regra ne’ebé klaru. Maibé, iha situasaun balu, dalaruma ema alta entidade sira mós balu lakohi atu hatais roupa ne’ebé rebo-rebo.

“Polísia ne’e labele ho farda kompletu, entaun, tempu ruma, hatais sivíl, liu-liu kuandu, sé ema ne’e halo nia atividade privadu ruma, entaun Polísia mós sivíl. Ne’ebé ida-ne’e sai ona saida ida, dala-ida tán ba PNTL hosi UEP, bolu ona para hahú investiga ona sira nia asaun,” Komisáriu Polísia, Faustino da Costa hateten tán.

Jornalista: Rogério Pereira Cárceres