Hatutan.com, (20 Abríl 2022), Dili-Diretór Jerál Sekretariadu Tékniku bá Administrasaun Eleitorál (STAE), Acilino Manuel Branco, konfirma katak, ofisial sira STAE nian hanesan brigada no polling staff sira ne’ebé koloka  iha Sentru Votasaun Ossuhuna, Postu Administrativu Baguia, Munisípiu Baucau, iha duni karimbu bá Eleisaun Antesipada Parlamentár tinan 2018 nian. Maibé, karimbu ne’e seidauk utiliza bá iha bulletin votu nian, tanba brigada sira deside troka karimbu eleisaun prezidensiál 2022.

Diretór Jerál STAE, Acilino Manuel Branco. Foto/Hatutan.com

“Ida maka, ita-boot sira mós rona katak, iha utilizasaun karimbu ida ne’ebé maka mai hosi 2018 ninian. Situasaun ida ne’e akontese, kuandu iha inísiu dadeer, madrugada, atu halo preparasaun iha sentru votasaun ida iha postu administrativu Baguia, maka ita ninia ofisial eleitorál sira haree katak, iha karimbu ida mak, la’ós eleisaun prezidensiál 2022 nian, maibé karimbu 2018 bá eleisaun parlamentár antesipada ninian,” Acilino Manuel Branco informa ba jornalista sira liuhosi konferénsia imprensa iha salaun STAE, Caicoli,  Díli, Kuarta (20/04/2022).

Alcino Branco hateten, STAE ninia prosesu sira kona-bá transportasaun urna  bá iha munisípiu sira, sempre liuhosi faze ida, antes atu to’o iha prosesu votasaun. Bainhira material sira sai hosi Díli bá iha munisipiu sira, sei presiza tán loron balu atu halo verifikasaun, pakotementu, molok transporta ba iha sentru votasaun ida-idak, ne’ebé akompaña direta hosi brigada sira, ho parte PNTL, entrega bá iha órgaun eleitorál sira, hodi hahú halo preparasaun.

“Atu hatete katak, tanba ita-nia instrusaun ne’e klaru bá iha brigada, ofisiál eleitorál  sira, iha prosesu preparasaun material atu utiliza ba iha estasaun sira-ne’e, ita orienta sira, para atu koko, halo teste bá iha karimbu sira ne’e. Seidauk utiliza ba iha prosesu votasaun. Ida-ne’e, ha’u hakarak hato’o ba iha públiku katak, seidauk utiliza ba iha prosesu votasaun. Iha dadeer, kuandu liu ho prosesu sira hanesan ha’u hato’o katak, sira koko bá iha surat-tahan sira, maka, haree katak, karimbu ne’e, karimbu 2018,” diretór jerál STAE ne’e haktuir.

Hafoin deteta erru ida ne’e, parte STAE Munisípiu Baucau ninian, informa direta ba nia (diretór STAE), hodi fó orientasaun para depois troka kedan karimbu ne’e, antes utiliza ba iha prosesu votasaun. Tanba ne’e, laiha situasaun ruma maka akontese sees hosi prosedimentu sira ne’ebé mak iha.

Iha mós kazu insidente seluk ne’ebé mak akontese iha Munisípiu Bobonaro. Iha ne’ebá, diretór STAE Bobonaro informa katak, iha sidadaun ka eleitór ida mak tenta lori tama telefone kamera ba sentru votasaun, ho objetivu atu hasai fotografia bá kandidatu ne’ebé nia vota, iha kabina de votu nia laran. Maske iha lei bandu atu lori instrumentu sira balu hanesan sasán kro’at, no mós kamera sira, tama iha sentru votasaun.

“Mais parese deskuida  kontrola sira balu, prontu, ita nia eleitór sira balu depois ezerse tiha sira direitu votu ne’e, tenta atu hasai ninia eskolla ne’e,no parese atu halo publikasaun iha média sosiál sira balu” diretór Acilino informa tán.

Ikus mai konsege deteta hosi STAE nia ofisial eleitór sira, no komunika kedan ho parte seguransa, liu-liu parte PNTL ne’ebé maka destakadu iha  ne’ebá, no foti kedan medida ruma atu oinsá ho asaun ne’ebé mak nia halo ne’e, labele iha fali influensia ba ema hotu-hotu bele ezerse nia direitu ne’e votu ne’e, ho konsiénsia,

Iha Munisípiu Viqueque, enfrenta problema estrada, tanba kondisaun estrada iha área ne’ebá, maioria mak aat. Iha prosesu transportasaun urna hosi munisípiu ba sentru votasaun sira, buat hotu-hotu la’o ho di’ak, maibé atu lori fila-fali ba munisipiu mak difisil, tanba akontese loos ho udan, hodi halo kondisaun estrada sai gráve liután. Maibé, liuhosi koordenasaun ho autoridade munisipiu Viqueque, konsege fó solusaun, no material sensitivu no la’ós sensitivu sira ne’e, to’o iha STAE munisípiu ho seguru, no halo ona prosesu apuramentu sira.

“Insidente ne’ebé maka ita bele dehan katak grave no mós atu impede lala’ok, prosesu, laiha. Iha horiseik, iha prosesu votasaun maka, ha’u hanoin katak, públiku, ita-boot sira rasik mós akompaña no asiste katak, iha maka problema uitoan kestaun lojístika, liu-liu iha Díli, ne’ebé maka iha sentru ida rua, mak falta de lista votante, mais depois bainhira prosesu votasaun la’o, brigada sira informa, imediata kedas ita solusiona lista ne’ebé maka iha,” diretór Acilino hateten.

Jornalista: Rogério Pereira Cárceres